Qurlyqtyq dodada Qazaqstan quramasy tolyq qurammen óner kórsetedi. Ulttyq qurama sapyndaǵy basty esimderdiń biri - álem chempıony Rızabek Aıtmuhan.
Qazaq jankúıerleriniń basty nazary Rızabekte bolady. Erkin kúresten álem chempıony bul joly 125 keli salmaq dárejesinde beldesedi. Rızabek dál osy salmaqta sońǵy ret naýryz aıynda ótken Qazaqstan chempıonatynda kúresken edi.
Búginde Aıtmuhan táýelsiz Qazaqstan tarıhyndaǵy erkin kúresten tuńǵysh álem chempıony retinde el sportynyń basty juldyzdarynyń birine aınalyp otyr.
Erkin kúresten Qazaqstan namysyn Elaman Amangeldi, Nurdanat Aıtanov, Shattyq Alaıdar, Maıs Alıev, Nurdáýlet Seıilbekov, Erhan Ábil, Abylaıhan О́zembaev, Beıbarys Qasymbek jáne Kamıl Kýrýglıev qorǵaıdy.
Grek-rım kúresinen Raýan Bekimov, Aıbek Aıtbekov, Dıas Nuraqov, Damır Ibrashov, Nurmuhammed Ibrahım, Álıhan Dýrsýnov, Kırıll Mınko, Erasyl Jeńis, Islam Evloev jáne Djohar Ýzarov synǵa túsedi.
Áıelder quramasy sapynda Laýra Ǵanyqyzy, Farıda Ábdirahmanova, Shuǵyla О́mirbek, Altyn Shaǵaeva, Vıktorııa Hýsaınova, Tynys Dýbek, Tomırıs Shaıshova, Beıbit Seıdýálı, Jibekjan Sabyrjanova jáne Alına Ertóstik óner kórsetedi.
Jastar arasyndaǵy Azııa chempıonaty 23 mamyr men 1 maýsym aralyǵynda ótedi.
