Qoǵam • 04 Tamyz, 2021

«Para bermeseń, bara ber...»

Bul máselege baıaǵyda núkte qoıylýy kerek edi. Glýbokoe aýdanyndaǵy «Prıırtyshe 1» jaýapkershiligi shekteýli seriktestiginiń basshysy Vıktor Leontev kásibin dóńgeletýde kedergilerdiń baryn aıtyp, tıisti oryndarǵa bir emes, birneshe ret shaǵymdanǵan. Alaıda onysynan esh nátıje shyǵara almaǵan. Qaıda jazsa da, máseleniń sheshimi aýdandyq ákimdikke kelip tirelgen.

Mereı QAINARULY

Endi mine, Glýbokoe aýdany ákiminiń orynbasary kásipkerden para aldy degen kúdikpen quryqtalyp tyndy.

Resmı portaldardaǵy málimetterge kóz júgirtsek, sot kabınetinde osy is boıynsha basty sot talqylaýyn 12 shildege taǵaıyndaý týraly 2021 jylǵy 29 maýsymdaǵy qaýly jarııalanǵan. Ol jerde isti toqtata turýǵa eshqandaı negiz joq delingen. Iаǵnı kúdiktini kúzetpen ustaý túrindegi bultartpaý sharasy ózgerissiz qaldyrylǵan.

Al aýdan ákiminiń orynbasary 24 sáýirde «Prıırtyshe 1» JShS basshysy Vıktor Leontevtiń aryzynan keıin ustalǵan kórinedi. Ol laýazymdy tulǵalardyń oryndalǵan jumystar aktisine kedergisiz qol qoıǵany úshin aqsha qarajatyn bopsalaý deregine jáne quny 56 mıllıon teńge bolatyn aýdandyq mańyzy bar avtojoldardy qysqy jáne jazǵy kútip-ustaý boıynsha kórsetiletin qyzmetterge tender ótkizý barysynda onyń kásiporny biliktilik talaptaryna sáıkes kelmeýin alǵa tarta otyryp, zańsyz jaramsyz dep tanylǵanyna shaǵymdanǵan. Al shyn máninde, kásiporyn 15 jyldan asa ýaqyt boıy aýdan joldaryna qyzmet kórsetip kelgen eken. Osynshama tájirıbesi bar ujymnyń «biliktilik talaptaryna saı kelmeı qalýynyń» ózindik syry bar bolyp shyqty.

– Bizdiń kompanııamyz buǵan deıin memleket menshiginde bolyp, jol jóndeý jumystarymen aınalysqan. 2019 jyly ǵana jekeshelendirilip, tyń kúshpen jumysqa kirisken. Alaıda jekeshelendirý shartynyń negizinde kásiporyn 5 jyl ishinde óz beıinin ózgerte almaıdy. Onyń maqsaty – aýdandyq mańyzy bar joldardy kútip ustaý. Iаǵnı kompanııa bul jumystardan basqa jumystardy oryndaı almaıdy. Sóıte tura, bizge buryn atqaryp kelgen jumysymyzben aınalysýǵa múmkindik berilmegenine qalaı renjimessiń?! – deıdi seriktestik dırektory Vıktor Leontev.

Onyń aıtýynsha, jergilikti sheneýnikterdiń qaharyna ushyraǵan kásiporynnyń 23 jumyskeri qazirgi ýaqytty jumyssyz qalǵan. Ashpaǵan esigi, barmaǵan jeri qalmaǵan soń Vıktor Leontev oblystan ádildik tabýdan kúder úzip, el Prezıdentine júginýge májbúr bolǵan. Memleket basshysy kásipkerdiń shaǵymyn Bas prokýratýraǵa tekserýdi tapsyrǵan. Onyń nátıjesi belgili bola bastaǵan sııaqty. Para aldy degen kúdikpen aýdan ákiminiń orynbasary ustalǵandyǵy – sonyń aıǵaǵy.

El Prezıdenti usynǵan «Halyq únine qulaq asatyn memleket» tujyrymdamasy, mine, osylaı júzege asyp jatqandyǵyna Vıktor Leontev syndy kásipkerler úlken úmit artyp otyr. Shyndyǵynda, bul tipten Memleket basshysyna jetkizbeı-aq, oblys deńgeıinde sheshiletin másele edi ǵoı.

Baıaǵyda jurt: «Bastyqqa para berme, bara ber», deýshi edi. Qazirgi sheneýnikter: «Para bermeseń, bara ber...», deıtin bolǵany ma, qalaı?

Qazir glýbokoelyqtar tergeý júrgizilip jatqan shýly istiń sońy nemen aıaqtalatyndyǵyn taǵatsyzdana kútip otyr. О́ıtkeni qoldanystaǵy zańnama boıynsha kúdikke ilingen orynbasarynyń qylmysy sot arqyly dáleldense, aýdan ákimi otstavkaǵa ketýge tıis. Jurt kóńilinde «Qarǵa qarǵanyń kózin shuqymaıdy» degen emes pe? Ádildik izdegen kásipkerdiń de endigi jaǵdaıy qalaı bolar eken?..», degen alańdaýshylyq ta bar.

Shyǵys Qazaqstan oblysy