Dóńgelek ústeldiń teń moderatory QR Prezıdenti janyndaǵy Ulttyq qoǵamdyq senim keńesiniń múshesi, qoǵam qaıratkeri Murat Ábenov boldy.
Shara barysynda Geografııa jáne sý qaýipsizdigi ınstıtýty, Qazaq sý sharýashylyǵy ǵylymı-zertteý ınstıtýty, «Astana» halyqaralyq ǵylymı kesheniniń ǵalymdary baıandama jasady. Ol klımattyń ózgerýi men sharýashylyq qyzmettiń Balqash kóline áseri týraly ǵylymı zertteýlerdiń nátıjesi jáne yqtımal ssenarııi bar ekonomıkalyq áreketter týraly boldy.
Dóńgelek ústelge qatysýshylar Ile-Balqash óńirinde resýrs únemdeıtin sýarý tehnologııasyn engizý jáne Balqash kóline memlekettik monıtorıng júrgizý máselelerin talqylady.
«Balqash saǵasy men kóldiń ózin zertteý nátıjeleri Ile-Balqash óńiriniń damýy úsh kezeńge bólinetinin kórsetedi: 1970 jylǵa deıin shartty túrde tabıǵı, 1971 jyldan 1990 jylǵa deıin turaqsyzdyq, 1991 jyldan 2019 jylǵa deıin salystyrmaly túrde turaqty. Osylaısha, qazirgi ýaqytta Ile-Balqash óńirinde salystyrmaly túrde turaqty kezeń ótip jatyr. Osyǵan oraı Balqashtyń Aral teńiziniń taǵdyryn qaıtalaý qaýpi joq dep aıtýǵa bolady», dep jazady mınıstrliktiń baspasóz qyzmeti.
Qatysýshylar Balqash kóliniń ekojúıesine keri áserin tıgizbeı, Ile-Balqash óńirindegi halyq pen aımaqtyń ekonomıkasyn turaqty túrde sýmen qamtamasyz etý úshin sharalar qabyldaý qajet ekenin atap ótti. Ol úshin ǵalymdar Balqash kóliniń ońtaıly deńgeıin negizdeý, kóldegi sý men tuz almasý prosesin basqarý negizderi, kóldiń transshekaralyq basseınindegi yntymaqtastyqtyń ádistemelik negizderi syndy taqyryptar boıynsha qosymsha ǵylymı zertteýler júrgizýdi usyndy
Shara sońynda QR Ekologııa, geologııa jáne tabıǵı resýrstar vıse-mınıstri S.S.Qojanııazov dóńgelek ústelde aıtylǵan usynystar Balqash-Alakól basseıniniń problemalyq máselelerin sheshý úshin qoldanylatynyn atap ótti.
