Týrızmdi damytamyz desek, áýeli jolymyzdy jamap-jasqap alýymyz kerek. Onsyz saıahatshylardy tartý ońaı emes. Jaǵalaýyn Antalııaǵa teńep júrgen Alakólge jetýdiń ózi qııamet-qaıym. Jolaýshynyń júıkesin juqartyp, dińkesin qurtyp jiberedi. Kóliktiń júrý bóliginen saý-tamtyq qalmaıdy. Ásirelep aıtyp otyrǵan joqpyz, qyp-qyzyl shyndyq. Ýaqytsha salǵan aınalma joldyń ózi oıdym-oıdym. Dittegen jerińe jetkenshe shań jutasyń. Negizinde jolshylar sý shashyp, joldyń shańyn basyp otyrýy kerek edi. Ol da joq.
– О́tken aptada jeke kóligimmen Alakólge baryp qaıttym. Barǵanymyz bar bolsyn. Demalysymyzdy jol jelkeden shyǵardy. Shynyn aıtý kerek, О́skemennen shyǵa bere, Qasym Qaısenov kentiniń tusynda tehnıkalar qarbalas. Al Qalbataýdan Taskeskenniń burylysyna deıingi joldan asyr-gúsir jumys baıqamadym. Myna qarqynmen joldy kelesi jyly da aıaqtaı almaıtyn sııaqty, – dep kúmándanady óskemendik Dosan Dúısenov.
Kúmánmen qarap júrgen jalǵyz ol emes. О́skemen – Aıagóz, Tarbaǵataı, Úrjar arasynda únemi júretin taksıshilerdiń pikiri de – osy. Olar da kúre jol jýyq arada jóndele qoıady degen ýádege senbeıdi.
– Aýylda basqa jumys bolmaǵan soń qoldan keleri osy, taksıletemiz. Biraq tapqan-taıanǵan tıynnyń jartysy kóliktiń tetigine ketedi. Dóńgelektiń ózi 10-15 myń teńge turady. Al jol jýyq arada tolyq aıaqtalady degen ýádege senbeımiz, – deıdi taksıshi Arhat Raqymanov.
Jýyrda jol qurylysy salasynda jumysyn durys atqarmaǵan «QazAvtoJol» UK» AQ basqarma tóraǵasy, Indýstrııa jáne ınfraqurylymdyq damý mınıstrligi Avtomobıl joldary komıtetiniń tóraǵasy qyzmetinen bosatylǵan. Bul shara basqa basshylarǵa sabaq boldy ma, ýaqyt kórseter. Al ázirshe jol qurylysy bálendeı qarqyn alyp ketken joq. «QazAvtoJol» ulttyq kompanııasy» AQ Shyǵys Qazaqstan oblystyq fılıalynyń dırektory Erlan Qalymovtyń aıtýynsha, Omby – Maıqapshaǵaı, О́skemen – Taldyqorǵan baǵytyndaǵy kúre joldardy qaıta jańartý jumystary 2022 jyly aıaqtalady.
– Omby – Maıqapshaǵaı avtomobıl jolynda memlekettik emes qaryz esebinen qaıta jańartý jumystaryn «Sınsın» kompanııasy júrgizip jatyr. Epıdemııalyq jaǵdaıǵa baılanysty basqa memleketterden jumysshy kúshi kire almady, tehnıkalardy qurylys oryndaryna jetkizý úshin kóp ýaqyt joǵalttyq, – deıdi E.Qalymov.
Al Qalbataý – Maıqapshaǵaı baǵytyndaǵy 415 shaqyrym joldyń biraz bóligine qatty qabat tóselgen. Joba boıynsha, qaıta jańartý jumystaryna 157 mlrd teńge bólingeni belgili. Demek, jolshylar qarjydan qysylmaq emes. Tek memleket qarjysy tıimsiz jumsalyp ketpese boldy. Sebebi Memleket basshysy Qasym-Jomart Toqaev: «Elimizdegi respýblıkalyq jáne jergilikti joldardyń jaǵdaıyna qatysty azamattardyń aıtyp júrgen syny oryndy. Sapasyz jasalǵan jol jyl saıyn jóndeýdi qajet etedi jáne buǵan memlekettiń qarjysy tıimsiz jumsalyp jatyr», degen edi. О́te oryndy syn.
– Atalǵan tasjoldyń boıynda «Sıtık Konstrakshn», «K-Dorstroı» AQ jáne «Todını Sentral Azııa» JShS qaıta jańartý jumystaryn júrgizip jatyr. «Nurly jol» baǵdarlamasy aıasynda salynyp jatqan jol 2022 jyly tolyqtaı qoldanysqa beriledi, – dep sendirdi E.Qalymov.
Iá, Premer-Mınıstr Asqar Mamınniń ákimderge qoıǵan talaby oryndalmady. Jol salý jumystary sozbalańǵa salyndy. Ol olqylyqty pandemııanyń saldary delik. Zaman tynysh bolsa, «QazAvtoJol» ulttyq kompanııasy» AQ basshylyǵy ýáde etkendeı, eki baǵyttaǵy kúre joldar 2022 jyly tolyǵymen aıaqtalyp qalar.
Shyǵystaǵy jol qurylysy munymen toqtamaıdy. Aldaǵy ýaqytta Aıagóz – Qaraǵandy arasyna jańa jol túsedi. О́skemen – Shemonaıha, О́skemen – Semeı, Semeı – Barnaýyl joldaryna qaıta qurý júrgiziledi. Sonymen qatar О́skemen – Rahman qaınary baǵytyndaǵy kúre joldyń da kúrdeli tusy aıaqtalǵan joq.
Erlan Qalymov aıtqandaı, jol sapasyn qadaǵalaý jumystaryna kez kelgen el azamaty aralasyp, kemshin tustaryn aıtyp otyrýyna bolady. Ol úshin málimetti 1403 nómirine beınejazba, fotosýretimen joldaı alady.
Shyǵys Qazaqstan oblysy
