Aıtýly aqyn tabıǵaty kórkem Kókshetaýda ómirge kelip, jasynan poezııaǵa ǵashyq bolyp, óleń ólkesine erte qadam basty. Aldymen aýdandyq, keıin oblystyq, respýblıkalyq gazetterde nazdy naqyshtarǵa toly jyrlary jarııalanyp, oqyrmandarǵa tanyldy. Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetin aıaqtap, merzimdi basylymdarda qyzmet atqardy.
Marfýǵa Bektemirova shyǵarmashylyǵynyń eń bir jarqyraǵan shaǵy elimiz táýelsizdik alǵannan keıin bolsa kerek. El erkindigi men oı erkindigi aqynǵa qanat bitirip, ónimdi eńbek etti. «Janary jáýdir dúnıe», «Aıdynym meniń», «Ǵashyq júrek», «Eńlikgúl», «Meniń Atlantıdam», «Aqqýym meniń, qaıdasyń?» degen jyr jınaqtary jaryq kórdi. Bul kitaptarǵa synshylar qaýymy da zer salyp, parasatty pikirlerin aıtty. Aýzy dýaly aǵalalary da aqynǵa jyly sózderin aıamady. Máselen, Aqseleý Seıdimbek ony «Shynaıy sezimniń aqyny» dese, Qoıshyǵara Salǵarauly «Zerdeli, oıly aqyn» dep baǵalady. Aıtpaqshy, shaıyrdyń orystyń ataqty aqyny Anna Ahmatovanyń óleńderin óte sátti tárjimalaǵanyn aıta ketýge bolady.
Kesh barysynda sóz alǵan jazýshy, Memlekettik syılyqtyń laýreaty Álibek Asqar: «Men Marfýǵamen KazGÝ-diń jýrnalıstıka fakýltetinde birge oqydym. Sol kezde biz onyń bolashaǵynan úlken úmit kútken edik. Ol úmitimizdi aqtap, elge tanymal aqyn atandy. Tek ómiri qysqa boldy. Búgin Qalamgerler alleıasynda Marfýǵany eske alý keshiniń ótýi quptarlyq» dep áserli estelik órbitse, Qazaqstan Jazýshylar odaǵy Nur-Sultan qalalyq fılıaly dırektorynyń orynbasary, aqyn Oljas Qasym Marfýǵa lırıkasynyń kórkemdik deńgeıi týraly aıta kelip, onyń poezııadaǵy alar orny joǵary dep baǵalady.
Al aqynnyń jary, qalamger Esengeldi Súıinov ómirden ótken Marfýǵa Bektemirovanyń shyǵarmashylyǵy qazaq ádebıetiniń tórinen oryn alyp, onyń esimin este saqtaý maqsatynda Nur-Sultan, Qostanaı, Kókshetaý qalasynan kóshe nemese mektepke aqynnyń esimin berse degen oıyn aıtty.
Sondaı-aq kesh aıasynda aıaýly aqynnyń óleńderi oqylyp, onyń sózine jazylǵan ánderi oryndaldy.
