Sarapshylar statıstıkalyq derekter men modeldeý negizinde 2030 jylǵa qaraı jumys kúshiniń sany 9,7 mln adamǵa jetip, 2040 jyly bul kórsetkish 10,7 mıllıondy quraıdy, al 2050 jylǵa qaraı 11,4 mıllıonǵa deıin ósedi dep esepteıdi.
Bul rette, boljamdyq negizgi ssenarıı boıynsha 2030 jylǵa qaraı el halqy shamamen 20,7 mln adamdy quraıdy, 2040 jylǵa qaraı atalǵan kórsetkish 22,9 mln adamǵa deıin jetip, al 2050 jylǵa qaraı 25,5 mln adamǵa deıin ósedi dep kútiledi.
«Boljamǵa sáıkes 2030 jylǵa qaraı týýdyń joǵary deńgeıi men halyqtyń qartaıýyna baılanysty jumys kúshiniń halyqqa paıyzdyq qatynasy 46,7%-ǵa deıin tómendeıdi. Bul ekonomıkalyq belsendi halyqqa júkteme ósetinin bildiredi», dedi ERDO Boljamdaý departamentiniń dırektory Dmıtrıı Shýmekov.
Sondaı-aq, óz boljamynda ERDO sarapshylary 2050 jylǵa qaraı halyq sanynyń óńirlik sáıkessizdiginiń kúsheıetinin atap ótti. Turǵyndar sanynyń eń kóp ósýi respýblıkalyq mańyzy bar qalalarda kútiledi: Nur-Sultan – 2,7 ese (1,9 mıllıon), Almaty – 1,8 ese (1,6 mıllıon) jáne Shymkent – 2,4 ese (1,5 mılllıon). Budan basqa, Mańǵystaý oblysynyń halqy eki esege (1,4 mln adamǵa deıin), Túrkistan oblysynda 500 myńǵa (2,5 mıllıonǵa deıin), al Almaty oblysynda 700 myńǵa (2,8 mıllıonǵa deıin) kóbeıýi yqtımal.
Aǵymdaǵy týý, ólim-jitim jáne kóshi-qon koeffısıentteri turǵysynda Shyǵys Qazaqstan, Qaraǵandy, Qostanaı, Soltústik Qazaqstan, Pavlodar jáne Aqmola oblystarynda halyq sanynyń birtindep tómendeýi baıqalatyn bolady. Alaıda, jalpy týý koeffısıenti kórsetilgen aımaqtarda ýaqyt óte kele aıtarlyqtaı ósip, etnıkalyq qurylymynyń ózgerýine jáne naqty kirisiniń artýyna baılanysty turǵyndardyń qonys aýdarýy tómendese, osy aımaqtardaǵy halyq sany turaqtanýy múmkin.
2050 jylǵa deıingi uzaqmerzimdi demografııalyq boljam mynadaı baǵyttar boıynsha jasaldy: halyqtyń jalpy sany, halyqtyń jas quramy, 2050 jylǵa qaraı ssenarııler boıynsha jas quramyndaǵy aıyrmashylyqtar, óńirlik sáıkessizdikter, óńirler boıynsha halyq sany, demografııalyq qarqyn, jumys kúshiniń sany,qurylymy jáne ortasha jasy, onyń óńirlik sáıkessizdikteri, óńirler boıynsha bólý jáne taǵy basqa.
Sonymen birge, 2021 jylǵy demografııalyq kórsetkishterdiń naqty ózgerisi negizinde osy boljamǵa túzetý jasaý josparlanǵan.
«Boljam tórt quramdas bóliktiń negizinde qurylady: halyqtyń bastapqy naqty sany, týý, ólim-jitim jáne halyqtyń kóshi-qon qozǵalysy. Bul 2022 jyldyń ózinde jańa statıstıkalyq derekter búgingi tańda ózekti bolyp otyrǵan baǵalaýlardan aıtarlyqtaı ózgeshe bolýy múmkin degendi bildiredi. Tıisinshe bul demografııalyq boljamdy jańartý qajettiligine ákelýi múmkin», dep túıindedi Dmıtrıı Shýmekov.
