Tarata aıtar bolsaq, 2021 jyldyń 10 tamyzynda jergilikti ýaqyt boıynsha 00.40-ta Jetibaı men Bozashy ken oryndarynda aýysym jumysshylary kásiporyn basshylyǵynan jalaqyny jáne basqa da yntalandyrý tólemderin kóterýdi talap etip, jumysty toqtatqan bolatyn.
«M-Tehservıs» JShS-niń Mańǵystaý fılıaly – Mańǵystaý oblysy aýmaǵynda uńǵymalardy jóndeý jáne kúrdeli jóndeý boıynsha is-sharalardy júzege asyratyn kásiporyn. Jumysshylardyń ortasha jalaqysy – 158 myńnan 315 myń teńge aralyǵynda.
Aıta keterligi, buǵan deıin 19 jáne 26 shildede munaıshylar kompanııa basshylyǵyna materıaldyq tólemderdi ulǵaıtý týraly birqatar talaby kórsetilgen ujymdyq hatpen júgingen-tin.
27 shildede qurylǵan kelisim komıssııasy sheńberinde taraptar jumysshylardyń talaptaryn tolyq oryndaý boıynsha ózara kelisimge kelmedi.
10 tamyzda jumys toqtatylǵan sátte áleýmettik áriptestermen kelissózder júrgizý úshin ken ornyna YNTYMAQ salalyq kásipodaq uıymynyń tóraǵasy Qaıraqbaı Jańabekov, Mańǵystaý oblysy kásipodaqtar ortalyǵynyń tóraǵasy Shadrah Ermekbaıuly, sondaı-aq Mańǵystaý oblysy boıynsha memlekettik eńbek ınspeksııasy basqarmasynyń ókilderi men «M-Tehservıs» JShS Mańǵystaý fılıalynyń basshylyǵy keldi.
Eńbek daýyn sheshý úshin prosedýraǵa sáıkes eńbek arbıtrajy quryldy. Ony YNTYMAQ kásipodaǵynyń tóraǵasy Qaıraqbaı Jańabekov basqardy. Mańǵystaý oblysy kásipodaqtar ortalyǵynyń tóraǵasy Shadrah Ermekbaıuly kelissózder prosesiniń baqylaýshysy boldy.
Kelissózder nátıjesinde taraptar ymyraǵa keldi. Eńbek arbıtrajy jumysshylardyń talaptaryn qanaǵattandyrý týraly sheshim shyǵardy.
«2021 jyldyń 1 tamyzynan bastap «M-Tehservıs» JShS Mańǵystaý fılıaly qyzmetkerleriniń jalaqysy 50 paıyzǵa kóterilsin; Qazaqstan Respýblıkasynyń Táýelsizdik kúnine deıin barlyq qyzmetkerge 20 AEK mólsherinde birjolǵy syıaqy tólensin; Munaıshylar kúnine jáne Naýryz merekesine syıaqy 10 AEK -ten 20 AEK-ke deıin ulǵaıtylsyn», dep kórsetilgen eńbek arbıtrajy hattamasynyń mátininde.
Sonymen qatar taraptar eńbek arbıtrajynyń sheshimi oryndalǵan kúnnen bastap úsh jyl ishinde ken ornynda eńbek daýlaryna moratorıı engizýge ýaǵdalasty.
Eńbek arbıtrajynyń sheshimine sáıkes jumysshylardyń ereýili toqtatyldy.
Qazaqstan Respýblıkasy Eńbek kodeksiniń 166-babyna sáıkes eńbek arbıtrajynyń sheshimi ujymdyq eńbek daýy taraptary úshin mindetti bolyp tabylatynyn atap ótken jón.
«Kelissózder arqyly ǵana ymyraǵa kelýge bolady. Kásipodaqtar Federasııasy ókilderiniń kelissóz prosesterine qatysý tájirıbesi, eger kásiporynda kásipodaq uıymy bolsa, kúrdeli eńbek daýlary jedel túrde eńbek ujymy jumysshylarynyń paıdasyna sheshiledi dep aıtýǵa bolady», deıdi Qaıraqbaı Jańabekov.
Esterińizge sala keteıik, YNTYMAQ salalyq kásipodaǵy men Mańǵystaý oblysy kásipodaqtar ortalyǵynyń belsendi qatysýymen bıylǵy 6 jáne 9 tamyzda Jańaózendegi «TrýbRemOrtalyq» JShS men «О́zenpromgeofızıka» AQ-taǵy eńbek daýlary sheshildi. Eki kompanııada da kelisim komıssııasy sheńberinde júrgizilgen kelissózder nátıjesinde jumysshylardyń ujymdyq talaptary qanaǵattandyryldy.
Jyl basynan beri Qazaqstan Kásipodaqtar federasııasyna múshe uıymdardyń qatysýymen qazaqstandyq kásiporyndarda 50-den astam eńbek daýy sheshimin tapty. Olardyń basym bóligi elimizdiń batys aımaqtarynda tirkelgen.
