Moıynqum aýdanyndaǵy Qumózek aýylynyń turǵyndary keıingi býynǵa úlgi bolsyn degen nıetpen ishimdikten bas tartyp otyr. Budan bylaı atalǵan aýyldaǵy barlyq dúkenniń sórelerinen «aram sý» alynyp tastalatyn boldy. Aýyl aqsaqaldary araq-sharapty syrttan ákelip ishýge de tyıym salý kerektigin aıtyp jatyr. Olar polıseılerdi de osy iske belsene aralasýǵa shaqyrdy.
«Alla Taǵala araq ishýdiń haram ekenin qasıetti Quran kitabynda eskertken. Ishimdiksiz aýyl – berekeli aýyl. Araq-sharap ishilmegen jerde duǵa qabyl bolady. Endi Qumózek aýyly kórkeıedi. Jańa meshit salynyp jatyr. Araq-sharap ishpeı ósken jastar rýhanı turǵydan kemel bolady. Qylmys ta bolmaıdy. Biz qazir araqtan bas tartý arqyly ózimizdi de, otbasymyzdy da saqtap otyrmyz. Endi bul bastama týraly basqa aýyldarǵa da baryp, túsindirý jumystaryn júrgizý kerek», deıdi Moıynqum aýdanynyń bas ımamy Rysbaı Espenbetov. Al spırtti ishimdik satýdan bas tartqan dúken ıelerine jurt alǵys bildirip jatyr. Tipti kásipker Erbolat Saýryqov sol dúken ıelerine araq satýdan túsken paıdany óz qaltasynan-aq beretinin aıtty.
«Aýylda aqsaqaldar keńesiniń jumysy kúsheıgen. Jastar jaǵy da óte belsendi. Jyl sońyna qaraı biz araq ishýdiń saldarynan bolatyn tóbeles pen qylmys sanynyń ózgerýi boıynsha salystyrmaly statıstıkany da jasap bermekpiz», deıdi Sybaılas jemqorlyqqa qarsy is-qımyl agenttigi Jambyl oblysy boıynsha departamenti basshysynyń birinshi orynbasary Ravıl Tólebaev.
Jalpy, búginde Jambyl oblysynda 5 aýdandaǵy 12 aýyl araq-sharap ishýden de, satýdan da bas tartyp otyr. Atalǵan aýyldardaǵy 126 dúken ıesi araq-sharap satatyn sertıfıkattaryn óz erkimen ótkizemiz dep otyr. Mundaı ıgi bastama endi óńirdiń ózge de aýdan, aýyldarynda jalǵasady degen úmit bar.
Jambyl oblysy
