«Qazaqstan Ǵarysh Sapary» UK» AQ baspasóz qyzmetiniń aqparatyna sáıkes, OneWeb álemdi sapaly ınternetpen qamtyp, málimetterdi joǵary jyldamdyqpen taratý maqsatynda tómen orbıtalyq spýtnıktik júıesiniń jahandyq jelisin qurýdy kózdep otyrǵan jetekshi kompanııalardyń biri sanalady.
Bıyl sáýirde Sıfrlyq damý, ınnovasııalar jáne aeroǵarysh ónerkásibi mınıstrligi men halyqaralyq korporasııanyń arasynda spýtnıktik baılanys salasynda yntymaqtastyq týraly memorandýmǵa qol qoıylǵan edi. Vedomstvo basshysy Baǵdat Mýsın bul ýaǵdalastyq Qazaqstannyń shalǵaı óńirlerinde ornalasqan eldi mekenderdi OneWeb-tyń spýtnıkteri arqyly keń jolaqty ınternetpen qamtýǵa múmkindik beretinin aıtqan.
Kezdesý barysynda korporasııa ókilderimen OneWebDemo jobasyn iske asyrý, spýtnık elementteriniń óndirisin oqshaýlaý, sol sekildi Ghalam kásipornynyń óndiristik bazasy men ǵarysh apparattaryn qurastyrý-synaq kesheninde ekinshi býyndaǵy OneWeb demo-spýtnıkteri jáne fazalyq antennalyq tor tehnologııasyn paıdalanyp, elektrondy túrde basqarylatyn antennalardy synaqtan ótkizý máseleleri pysyqtaldy.
Buǵan qosa, taraptar Ulttyq ǵarysh ortalyǵynda OneWeb spýtnıktik toptamasyn paıdalaný arqyly fazalyq antennalyq tor júıelerine testilik synaq júrgiziletinine ýaǵdalasty. Atalǵan synaqtar OneWeb Demo jobasymen birge, tutastaı Qazaqstanda OneWeb ınnovasııalyq tómen orbıtalyq spýtnıktik júıeni paıdalanýǵa baılanysty aımaqtyq saraptama ortalyǵyn qalyptastyrýǵa baǵyttalady.
