– Bar ıgiliktiń bastaýy – bilimde. Ásirese eń ozyq tehnologııalar engizilip jatqan kezde qabiletti balalardy izdeý, olardy oqytý men tárbıeleý óte qajet. Sol sebepten bizdiń ortalyq daryndy balalardyń bilimin jetildirýi, ǵylymı jobalardy qolǵa alýy úshin qolaıly orta qalyptastyryp, seriktesterimen, mamandandyrylǵan bilim oshaqtarymen birlese jumys isteıdi. Bilimniń bıik shyńyna umtylǵan oqýshylardy túrli olımpıada men ǵylymı jobalardy qorǵaıtyn saıystarǵa qatysýyna qoldaý bildirip otyr, – deıdi R.Sarbalın.
Bıyl respýblıkalyq olımpıadaǵa qatysatyn oqýshylardy daıyndaý maqsatynda «Onkúndik» jobasy uıymdastyrylypty. Elimizdiń barlyq aımaǵynan 1 557 oqýshy qatysqan bilim dodasynda atyraýlyq 42 oqýshy júldeger atanyp, 6-ýy altyn, 17-si kúmis, al 19 oqýshy qola medal alǵan. Respýblıkalyq olımpıadadan óńir komandasy jalpy esepte ekinshi oryndy, qoǵamdyq-gýmanıtarlyq baǵyttaǵy pánder boıynsha birinshi oryndy ıelendi. Al matematıka men fızıka pánderinen ótken halyqaralyq olımpıadada toptan ozǵan «Bilim-Innovasııa» lıseı-ınternatynyń eki oqýshysynyń mereıi ústem boldy.
– 1959 jyly bastaý alǵan halyqaralyq matematıka páni olımpıadasy 14-25 shildede Reseıde ótti. Oǵan «Bilim-Innovasııa» lıseı-ınternatynyń 11-synyp oqýshysy Aıbek Myrzataı qatysyp, birinshi júldege beriletin altyn medaldy jeńip aldy. Al 1967 jyldan beri ótetin halyqaralyq fızıka olımpıadasyn Lıtva Respýblıkasy uıymdastyrdy. Bul olımpıadada atalǵan lıseı-ınternattyń 10-synyp oqýshysy Rızabek Alpamys ekinshi júldeni ıelenip, kúmis medalmen marapattaldy, – deıdi ortalyq dırektory R.Sarbalın.
Onyń aıtýynsha, Aıbek Myrzataı 2019 jyly Balqan túbegi men Týımaada, Qytaıda, Baký men Almatyda ótken halyqaralyq matematıka olımpıadalarynan tórt altyn, bir kúmis medal ıelengen. Al byltyr osyndaı halyqaralyq bilim dodasynda esepke júıriktigimen erekshelenip, altyn medalǵa qosa absolıýttik chempıon ataǵyn jeńip aldy. Bıyl tórt olımpıadada baq synap, tórt altyn medalǵa ıe bolyp otyr.
Atalǵan lıseı-ınternattyń taǵy bir oqýshysy Rızabek Alpamystyń da halyqaralyq bilim saıysynan ıelengen júldesi jeterlik. Bıyl ol birneshe olımpıadaǵa qatysyp, qatarlastarynan oq boıy ozdy. Sóıtip, zerektigimen tanylǵan oqýshy tórt kúmis medalmen bilim shyńyn baǵyndyrýdan alǵan júldesin tolyqtyrdy.
Atyraý oblysy
