Qymyzdy aıtamyn, buryn baǵalamaýshy edik, sońǵy jyldary lıtrlep ishetin boldyq. Bıe baılap otyrǵan qymyzshylardyń arasynda da báseke artty. Biriniki birinikinen dámdi. Álemdi indet jaılaǵaly saýmalǵa da suranys kóbeıgen. Báseke demekshi, óskemendikter Katonnyń qymyzyn izdep ishse, katonqaraǵaılyqtar Qýattyń qymyzy qyzýly desedi. Qýat Amangeldiuly Jańaúlgi aýylynyń bas jaǵynda bıe saýyp, qymyz ashytyp otyrǵaly bes jyldan asty. Qymyz dáminiń ereksheligi bıesinde me, ıesinde me, bizge beımálim. Bireýler kúbisin qyzyl qaıyńmen ystaıdy deıdi, endi biri qordy jaqsy saqtaıdy dep boljaıdy. Bıznes bolǵan soń, qupııasyn eshkimge tis jaryp aıtpaýy zańdylyq.
Aıta keteıin, bálen qymyzǵa bálendeı jarnama jasaýdan aýlaqpyz. Jarnamasyz da qara kúzge deıin qymyz saýdasy qyzady. «Saýǵa – qýat, aýrýǵa – em».
Jańaúlgi aýylynyń ór jaǵyndaǵy jalǵyz úıden ala jazdaı adam aıaǵy arylmaıdy. Aýlasyna aqshańqan kıiz úı tigilgen. Kelimdi-ketimdi qonaqtar sonda kirip, sapyrylǵan sary qymyzdan aýyz tıedi. Olardy quraq ushyp qarsy alatyn Mergúl Talaptanova – aýyldyq mektepte tárbıe isiniń meńgerýshisi. Kezekti eńbek demalysy kezinde sharýashylyqtyń basy-qasynda júrip, bıe saýady. Uldary Nurtas pen Nurtaı da áke-sheshesiniń qolqanaty. Saýyn bıelerdi qaıyryp kelý, qulyn tartý sekildi jumystar Nurtastyń moınynda. Kúbi pisýge de ábden mashyqtanyp alǵan. Jalpy, Katonqaraǵaı óńirindegi balalardyń kóbi eńbekpen bite qaınasyp ósedi.
– Byltyrdan beri saýmal ishýge keletinder kóbeıdi. Keıde qymyzǵa artylmaı qalady. Elge qyzmet kórsetip otyrǵan soń, kópshiliktiń kóńilinen shyǵýǵa tyrysamyz. «Saýsaq birikpeı, ıne ilikpeıdi» demekshi, otbasymyzben birlesip, jazdaı saýynda júremiz, – deıdi Mergúl Beıbitqanqyzy syrly shelektegi saýmaldy kúbige quıyp jatyp.
Aǵash kúbisi kıiz úıdiń irgesinde quraq kórpemen qymtaýly tur. Tegi bir temperatýrany ustaýy kerek shyǵar. Al úıdiń ishki jabdyqtary – Mergúldiń óz eńbegi. Qoly qalt etse oıý oıyp, quraq kórpe, qyz jasaýlaryn tigedi.
Shyǵys Qazaqstan oblysy,
Katonqaraǵaı aýdany
