Chıkago turǵyny Tangtang Chjaoǵa 12 aıyp taǵylyp, árqaısysy boıynsha 10 jylǵa deıin bas bostandyǵynan aıyrý jáne 250 myń dollar (106 mıllıon teńgeden astam) aıyppul salynýy múmkin.
Sot qujattaryna sáıkes, er adam AQSh-tyń Aýrýlardy baqylaý jáne aldyn-alý ortalyqtary (CDC) beretin 125 vaksınasııa sertıfıkatyn satty dep aıyptalýda. Tergeý málimetteri boıynsha, Chjao sertıfıkattardy eBay ınternet-dúkeninde 2021 jyldyń naýryz-sáýir aralyǵynda satyp otyrǵan. Farmasevt ár jasandy qujattyń qunyn on dollarǵa baǵalaǵan. Aıyptaý qorytyndysyna sáıkes, jalpy alǵanda Chjao zańsyz áreketten 1270 dollardan (540 myń teńge) astam tabys tapty.
Tergeýshiler Chjao ózi jumys istegen dárihanadan CDC vaksınasııa sertıfıkattaryn urlady dep sanaıdy. Er adam Illınoıs shtatynyń Soltústik okrýginiń sotynda ózine taǵylǵan aıyptardy moıyndamady.
«Chıkago aımaǵynda atalmysh zań buzýshylyq birinshi ret oryn alyp otyr. Tergeý jalǵasady. Jaqyn arada jalǵan qujat rásimdeýdiń basqa da faktileriniń betin ashatyn bolamyz dep úmittenemin», dedi arnaıy agent Shıvon Djonson.
Illınoıs shtatynyń qarjylyq jáne kásibı retteý departamentiniń farmasevtıkalyq lısenzııalaryn izdeý Chjao eshqashan tártiptik jaýapkershilikke tartylmaǵanyn jáne 2018 jyly lısenzııa alǵanyn kórsetti.
FBR Chıkago keńsesiniń arnaıy agenti Emmerson Bıýı Chjaonyń áreketin «COVID-19-ǵa qarsy kúreske úles qosqandar úshin qorlaý» dep atady.
«Vaksına saldyrmaǵan adamdarǵa jalǵan sertıfıkattardy sanaly túrde satý mıllıondaǵan amerıkalyqtardy ólim qaýpine dýshar etedi», dedi Bıýı Ádilet departamentiniń qamaýǵa alý týraly baspasóz habarlamasynda.
AQSh Ádilet mınıstrligi bul oqıǵany tergeýdi Densaýlyq saqtaý jáne halyqqa qyzmet kórsetý departamentiniń bas ınspektorynyń basqarmasy da júrgizip jatqanyn habarlady.
