Atap aıtsaq, olardyń qatarynda balýan, Olımpıada júldegeri Elmıra Syzdyqova, boksshy, álem chempıonatynyń júldegeri Abylaıhan Júsipov, dzıýdoshylar, halyqaralyq týrnırlerdiń jeńimpazdary men júldegerleri Jansaı Smaǵulov pen Islam Bozbaev, ártistik júzý sheberleri Aleksandra jáne Ekaterına Nemıchter, jeńil atletshi Marııa Ovchınnıkova boldy.
О́kinishke qaraı, biz úmit artqan sportshylarymyz dodanyń bastapqy kezeńinde súrinip, úıge erte qaıtty. Iаǵnı el sportynyń nashar kórsetkishine qaraǵandylyq sportshylar da súbeli «úles qosty» dep aıtýǵa bolady.
Jasyratyny joq, Japonııada aıaqtalǵan dúbirli doda Qaraǵandy oblysy sportynyń keıingi jeti-segiz jyldaǵy júrip ótken jolynyń, jalpaq tilmen aıtqanda jetken jeriniń qandaı ekendigin kózge shuqyp kórsetti. Iаǵnı biz osydan birneshe jyl buryn yjdaǵatsyz jasalǵan birshama dúnıeniń yńyrshaǵy qalaı shyǵyp, qandaı «jemisin» bergenin endi baıqap otyrmyz. Eger aldaǵy ýaqytta aýǵan júk túzelmese, 2024 jyly Parıjde ótetin Olımpııa oıyndarynda da dál osy kepti kıermiz-aý degen ýaıym basym.
Qaraǵandylyq sportshylardyń Tokıoda sátsiz óner kórsetýiniń bir sebebi oqý-jattyǵý jıyndaryn uıymdastyrý barysynda jiberilgen olqylyqtarda jatyr degen syńaıdaǵy pikir bildirdi, arnaıy habarlasqanymyzda oblystyq dene shynyqtyrý jáne sport basqarmasynyń basshysy Temirhan Abylaev.
«Máselen, – deıdi taǵaıyndalǵanyna bir jyldan endi asqan oblys sportynyń basshysy, – oqý-jattyǵý jıyndarynyń júıeli túrde ótýine byltyrdan bergi pandemııanyń orasan zor nuqsan keltirgeni ras. Árıne, bárin álemniń ózin ábigerge salǵan indetke jabýdan aýlaqpyn. Aıtaıyn degenim – karantındik shekteýlerge baılanysty sheteldegi oqý-jattyǵý jıyndarynan qol úzgen sportshylarymyz óz ishimizde daıyndalýǵa májbúr boldy. Mine, osy jerde bizdegi oqý-jattyǵý jıyndarynyń ádistemesi mundaı júktemeni alyp júrýge ázir bolmaı shyqty. Bul – shuǵyl túrde saraptaýdy, jan-jaqty zertteýdi, sosyn belgili bir qorytyndysyn shyǵarýdy qajet etetin tamyry tereńge ketken másele».
Arqa sportynyń basshysy aıtqan sózdiń jany bar. Bıyl, mysaly, Qaraǵandy oblysyndaǵy joǵary sporttyq sheberlik boıynsha Ulttyq qurama komandalar sapynda júrgen sportshylarǵa, olardyń bapkerlerine degen qamqorlyqta qapy bolmady. Bir sózben aıtqanda, el namysyn qorǵaıtyn atletterimiz eshteńeden tarlyq kórmeı, alda turǵan dodaly jarystarǵa alańsyz daıyndalý múmkindigine ıe bolǵan edi.
О́kinishtisi sol, artylǵan senim men úmit aqtalmady. Jalpy, Tokıo Olımpıadasynyń qorytyndysy boıynsha úlken basqosýlar ótip, keń aýqymda talqylaýlar bolady, tıisti qorytyndy shyǵarylady degendi aıtady Temirhan Abylaev.
«Ýaqyt degen – júırik. Kelesi Parıj Olımpıadasyna úsh jyl emes, eki jarym jyl ǵana qaldy deı berýge bolady. Eger biz shuǵyl túrde keshendi sheshimder qabyldamasaq, Tokıodaǵy jaǵdaıdy taǵy da bastan keshetinimiz anyq. Dál qazirgi ýaqytta bizdiń aldymyzda zor mindet tur. Biz úshin talantty degen sportshylardy taýyp, olardy baýlý qanshalyqty mańyzdy bolsa, óz isine jan-tánimen berilgen bilikti jattyqtyrýshylar quramyn ósirip shyǵarý da – kún tártibinde ótkir turǵan basty máseleniń biri. Mine, osy jáne basqa da kezek kúttirmeıtin sharýalar júzege asqanda ǵana bizden Sápıevter men Syzdyqovalardyń izbasarlary shyǵady», deıdi sport basshysy.
Iá, Temirhan Abylaevtyń bul sózimen kelispeske bolmas. Osy oraıda, jattyqtyrýshynyń sportshy ómirinde mańyzdy ról oınaıtyn basty tulǵa ekenin taǵy bir márte qaıtalap aıtýdyń artyqtyǵy joq. Bapkerdiń deńgeıi – sportshy jetistiginiń ólshemi. Máselen, bokstan Tokıo Olımpıadasyna qatysýshy Abylaıhan Júsipovti alaıyq. Atalǵan bylǵary qolǵap sheberi jasóspirimder men jastar arasyndaǵy halyqaralyq deńgeıdegi jarystarda júlde bitkenniń túgelin jeńip aldy. Biraq eresekter arasyndaǵy dodalarda bul boksshy biz kútken deńgeıden kórine almady. Osy jerde Abylaıhan Júsipovtiń keıingi kezdegi sátsiz óneriniń bir sebebi jeke bapkerdiń biliktilik deńgeıinde jatqan joq pa degen de oı keledi.
Álbette, bul – biz úmit artqan atletterdiń kóbiniń basynda bar jaǵdaı. Qaraǵandylyq dzıýdoshylar Jansaı Smaǵulov pen Islam Bozbaev týrasynda da aıtylar syn az bolmaı tur. Bul sportshylardyń tórtjyldyqtyń basty básekesinde ala-qula óner kórsetýi – Olımpıada aldyndaǵy daıyndyqqa jetkilikti túrde mán bermegendiktiń saldary dep batyl tujyrym jasaýǵa negiz beredi. Muny bapkerler shtabynyń jibergen kemshiligi, jattyǵý jumystaryn uıymdastyrý barysyndaǵy shalaǵaılyq dese de shyndyqtyń aýylynan alys ketpegendik bolar edi.
Bir ókinishtisi, keıbir ákim-qaralar sporttaǵy jetistikti bul salaǵa bólingen qarajattyń mólsherimen ǵana ólsheıdi. Olarǵa salsań, búgingi bergenniń qaıtarymy kúni erteń bolýy kerek. Álbette, bul túbirimen qate jáne taıaz túsinik. Chempıondardy tárbıeleý degenniń ózi shúmektep tógilgen ter, shydamdylyq pen qajyrlylyq óz aldyna, uzaq ýaqytty qajet etetin kúrdeli úderis. Bul degenińiz, solqyldaǵan jas shybyqty mápelep kútip, jyldardy araǵa salyp baryp alyp báıterekke aınaldyrǵan sııaqty eren eńbektiń jemisi.
«Buqaralyq jáne balalar sportyn damytýǵa kóńil bólip, sol arqyly álemdik arenada úlken tabystarǵa qol jetkizýge umtylý qajet», degen Memleket basshysynyń sózi sanada saǵattaı syrtyldap-aq tur. Iá, Olımpıadada eldiń baıraǵyn kóterip, ánuranyn shyrqatar sańlaq sportshyny bala kúninen baýlý – ortaq maqsattyń múddesine jumylǵan basshysy bar, qosshysy bar, birneshe toptyń aldyndaǵy asqaraly mindet. «Daryndy shákirt bolǵanymen, bilikti bapker, olardy barynsha qoldap otyratyn mamandar men basshylyq bul iste bir jaǵadan bas, bir jeńnen qol shyǵarmasa, eńbektiń zaıa ketkeni deı berińiz, – deıdi Temirhan Abylaev. – Sózimizdi túıinder bolsaq, bapker – alymdy, shákirt – shalymdy, bularǵa degen basshylyqtyń qamqor peıili tolymdy bolmaı, joǵary sheberlik sportynyń baǵy eshqashanda janbaq emes».
Iá, el sportynyń aldynda eresen zor mindet tur: sonyń biri – Tokıodaǵy toqyraýdan durys qorytyndy shyǵaryp, ony Parıjdegi baıraqty básekede paıdaǵa jarata bilý. Eń bastysy, bul salada beleń alǵan tártipsizdik, berekesizdik, biliksizdik, bir sózben aıtqanda joıdasyz júgensizdik tyıylǵanda ǵana, ábden júdep-jadaǵan sportymyz burynǵy jaraý kúıin qaıta tabar edi degenge sengimiz-aq keledi.
Qaraǵandy oblysy
