Bıyl az qamtylǵan otbasynyń árbir oqýshysyna kórsetiletin kómek mólsheri 40 myń teńgeni quraıdy. Bul týraly tamyz aıyndaǵy onlaın-keńeste elorda ákimi Altaı Kólginov aıtqan bolatyn.
«Eger otbasyda tórt bala bolsa, onda ár balaǵa 40 myń teńgeden bólinedi. Osylaısha, otbasy mektep kıimin, aıaq kıim men mektepke arnalǵan kerek-jaraqtaryn satyp alýǵa 160 myń teńge paıdalana alady. «Jalpyǵa mindetti oqytý» baǵdarlamasy bıyl 11 tamyzda bastaldy. Jalpy bilim berýmen 15 myńnan astam oqýshyny qamtýdy josparlap otyrmyz. Qajet bolsa, qamtýdy qosymsha arttyratyn bolamyz. «Mektepke jol» dástúrli aksııasy aıasynda da oqýshylarǵa kómek kórsetiledi. Bul baǵdarlamamen taǵy 7 myń bala qamtylady. Aýdandyq ákimdikter bolsa, 2 myńnan astam oqýshyǵa mektep kerek-jaraqtary bar sómkeler tabystaıdy», dedi Altaı Kólginov.
Jalpyǵa mindetti oqytý sheńberinde kómek alýǵa ótinish berý úshin ata-analar bala oqıtyn mektepke júginýi qajet. Kómek kelesi sanattaǵy oqýshylarǵa kórsetiledi:
- Memlekettik ataýly áleýmettik kómek (AÁK) alýǵa quqyǵy bar otbasylardan shyqqan balalarǵa;
- Jan basyna shaqqandaǵy tabysy eń tómengi kúnkóris deńgeıinen tómen, AÁK almaıtyn otbasylardan shyqqan balalarǵa;
- Otbasylarda turatyn jetim balalarǵa jáne ata-anasynyń qamqorlyǵynsyz qalǵan balalarǵa;
- TJ saldarynan shuǵyl járdemdi talap etetin otbasylardan shyqqan balalarǵa;
- Bilim berý uıymynyń alqaly organy aıqyndaıtyn bilim alýshylar men tárbıelenýshilerdiń ózge de sanattary.
