Jergilikti úkimet Mýrsııanyń ońtústiginde ornalasqan Mar Menorada balyqtyń qyrylýyna jaqyn kúnderi bolǵan ystyq aýa raıyn sebep qylǵan. Alaıda ǵalymdar jergilikti aýyl sharýashylyǵynyń qorshaǵan ortany lastaýy sýdyń sapasyn nasharlatty degen pikirde. Máseleniń mán-jaıyn anyqtaý úshin quqyq qorǵaý salasynyń ókilderi arnaıy tergeý júrgizip jatqan kórinedi. Al turǵyndar bolsa kinálilerdi taýyp, tıisti shara qoldanýdy talap etip narazylyq aksııalaryn ótkizdi.
Ispandyq buqaralyq aqparat quraldarynyń habarlaýynsha, ortalyq úkimet Mar Menordy apat aımaǵy dep jarııalaý týraly ótinishti qarastyrýda. Bul suranysty kóptegen jyl boıy ekologııalyq problemalardan zardap shekken lagýnany qutqarý jónindegi qysymǵa qalǵan jergilikti bılik ókilderi jiberip otyr.
Ispanııanyń Jerorta teńiziniń ońtústik-shyǵys jaǵalaýynda ornalasqan lagýnada bir kezderi týrızm jandanyp, kelýshiler kóp bolǵan, sondaı-aq osy aımaqty meken etken teńiz janýarlarynyń sany da az bolmaǵan. Alaıda sońǵy jyldary sýdyń sapasy nasharlap, aımaqtyń ekojúıesi kúrdeli máselelerge tap bolǵan. Saldarynan osyǵan deıin de, 2016 jáne 2019 jyldary balyqtyń jappaı qyrylýyna jol berilgen.
