Aqmola oblysyndaǵy kenish jáne kásiporyndardaǵy altyny bar materıaldardy jymqyrýmen aınalysqan qylmystyq toptyń jolyn kesý maqsatynda Ishki ister mınıstrligi arnaıy jasaqty tarta otyryp Nur-Sultan, Almaty, Shymkent, Aqmola, Mańǵystaý oblystarynda arnaıy operasııa ótkizdi.
Keshendi is-shara barysynda qylmystyq júıeniń barlyq áreketi qujatqa túsirildi. Onyń ishinde zańsyz altyn óndirýden bastap, daıyn zergerlik buıymdy satý oryndary da qamtylǵan. Tipti ónimdi kóliktegi jasyryn orynda alyp júrý, oǵan qoldan jasalǵan qujattar ázirleý de bar.
Qylmystyq júıeni uıymdastyrýshylar zańsyz altyn izdeýshi «brıgadırlerdi» qarjylandyra otyryp zańsyz altyn óndirý jumysyn júrgizýge jaǵdaı jasaǵan.
40 nysandy tintý kezinde kelesi zattar tárkilendi:
- Altyny bar metaldy ónidiretin sehtyń qyzmetin uıymdastyrýǵa qajetti qurylǵylar (ustatý qondyrǵysy, hımıkat-reaktıvter jáne basqa da qoldan ázirlengen saımandar);
- Almaty men Shymkenttegi zerger buıymdaryn balqytatyn jáne ázirleıtin eki jasyryn seh (balqytý stanogi, altyn quıatyn qalyp, konsentrattar jáne basqa da qural-jabdyqtar);
- 95 mln 801 myń teńge jáne 356 myń AQSh dollary;
- Altyn buıymdar men usaq altyn qıyrshyǵy, jalpy salmaǵy 10 keliden asady;
- 13 qymbat kólik (2020-2021 jylǵy Lexus LX 570, Nissan Patrol, Toyota);
- 5 qarý;
- Shymkenttegi jasyryn sehtyń qyzmetine qatysty qujattar.
Qylmysqa qatysy bar degen kúdikpen 32 adam ustalyp, onyń 9-y ýaqytsha ustaý ızolıatoryna qamaldy.
Qylmystyq topty uıymdastyrýshylardyń ústinen Qylmystyq kodekstiń 262-baby 1,2-bóligimen, 188-baptyń 4-bóligimen, 196-baptyń 4-bóligimen qylmystyq is qozǵaldy. Qazirgi ýaqytta sotqa deıingi tergeý amaldary júrgizilip jatyr.
