Mazmundy is-sharaǵa Mádenıet jáne sport mınıstrligi Arhıv isteri jáne qujattamany basqarý komıtetiniń tóraǵasy Qýat Borash, belgili qalamgerler, Memlekettik syılyqtyń laýreattary Nesipbek Aıtuly men Álibek Asqarov, «Egemen Qazaqstan» respýblıkalyq gazeti» aksıonerlik qoǵamynyń basqarma tóraǵasy Darhan Qydyráli, L.N.Gýmılev atyndaǵy Eýrazııa ulttyq ýnıversıtetiniń professory Zadash Dúkenbaeva, qujattanýshy ǵalym Mırbolat Jaqypov jáne arhıv mamandary qatysty.
Aıtýly shara barysynda Ulttyq arhıv dırektory Saǵıla Nurlanova jazýshynyń tulǵalyq qasıetin ár qyrynan tanýda – arhıv qujattarynyń mańyzy zor ekendigine toqtala kelip: «Aqseleý álemi – qazaq álemi, ondaı tulǵa sırek týady. Ardaqty azamattyń sanaly ǵumyry, maqsat-múddesi ultqa qyzmet etýmen ótti. Aqseleý Seıdimbek – ult rýhanııaty men mádenıetin damytýǵa ólsheýsiz úles qosyp, tarıhta óshpes izin qaldyrdy», dedi. Odan keıin sóz alǵan Nesipbek Aıtuly men Álibek Asqarov qabyrǵaly qalamger týraly qyzyqty estelikterimen bólisse, «Egemen Qazaqstan» respýblıkalyq gazeti» aksıonerlik qoǵamynyń basqarma tóraǵasy Darhan Qydyráli tuǵyrly tulǵanyń qundy eńbekteri jaıynda parasatty sóz órbitti.
Aqseleý aǵanyń aldaǵy seksen jyldyq mereıtoıyna arnap oqyrmanǵa jol tartqan jınaqqa syrbaz sýretkerdiń kózi tirisinde óz qolymen tapsyrǵan qoljazbalarynyń túpnusqasy, sırek kezdesetin jeke qujattary toptastyrylǵan. Kitap alty bólimnen turady. Máselen, birinshi bólimge, talantty tulǵanyń «Jeke qujattary» jınaqtalsa, ekinshi bólimge «Hattary» berilgen. Jalpy, daraboz azamattyń arhıvindegi qujat qorynda 1961-2009 jyldar aralyǵyndaǵy 700-ge jýyq haty jınaqtalǵan. Sonyń ishinen kitapqa Á.Marǵulanǵa, Sh.Murtazaǵa, M.Maǵaýınge, T.Saǵıtovke, I.Tasmaǵambetovke jáne qalamdas dostaryna jazǵan hattary iriktelip alynǵan. Ondaǵy sýretkerdiń sóz sheberligi men parasatty oılary kim-kimdi de qyzyqtyrady. Aqseleý aǵany halqymyz tamasha jazýshy, kórnekti ǵalym dep ǵana emes, etnograf retinde de jaqsy biledi. Sondyqtan jınaqtaǵy úshinshi bólim – «Etnografııalyq jazbalar» dep atalady, qoljazba «Salt-dástúr kórinisteri», «Uǵym», «Túsinik», «Yrym», «As qamy – adam qamy», «Qazaqtyń ulttyq oıyndaryna qatysty», «Tórt túlik», «Tabıǵat – ana» dep qor ıesiniń ózi toptap, jikteýi boıynsha engizilgen. Tórtinshi bólimge avtordyń Q.Sátbaev, Sh.Ýálıhanov, Á.Marǵulan, sekildi ardaqtylar týraly tolǵaýlary men qalamdas dostary týraly jazǵan dúnıeleri ense, besinshi bólimge 1959-1969 jyldarda gazet-jýrnalda jarııalanǵan túrli taqyryptaǵy maqalalary men kórkem shyǵarmalarynyń qoljazbalary berilgen. Al altynshy bólimge zamandastary men jaqyn dostarynyń saǵynyshpen jazǵan estelikteri men jazýshynyń aıshyqty fotosýretteri jınaqtalǵan.
Sonymen qatar rýhanı jylylyqqa toly keshte Halyqaralyq «Shabyt» festıvaliniń Gran-prı júldegeri Dosym Maqsutov asyl aǵanyń jeke qoryndaǵy notaǵa túsirgen kúılerdi kúmbirletip, jas aqyn Qabıden Qýanyshbaıuly qalamgerge arnaǵan óleńin oqydy.
