Koronavırýs indetin, onyń qaýpin aman-esen eńserý, barlyq bıýdjettik qyzmetkerlerdiń jalaqysyn ósirý, shaǵyn jáne orta bıznesti qoldaý, saıası reformalardy jalǵastyrý, jastardy yntalandyrý, basqa da kezek kúttirmeıtin sharýalar qolǵa alynbaq.
Erekshe atap óterligi – sóz bolǵan árbir mindet jalpylama ýáde emes, naqty sandarmen, qabyldanýǵa tıis zańdyq aktimen tolyqtyrylǵany. Olaı bolsa, olardyń iske asýyn qoǵam ózi baqylaı alady.
Ornyǵa bastaǵan osy tájirıbe qazirdiń ózinde oń nátıjelerin berip otyr. Máselen, ótken jylǵy Joldaýda berilgen tapsyrmalar jemisin búginde kóptegen azamatymyz sezinip úlgerdi. Olardyń ishinde jalaqysy 25-50 paıyzǵa ósken ustazdar men dárigerler, zeınetaqy qoryndaǵy qarjysyn paıdalaný arqyly bir mıllıonnan astam otandasymyz turǵyn úı jaǵdaıyn jaqsartyp alǵany, partııaǵa kirmeı-aq jeke tulǵalardyń saılaýǵa túsýi sııaqty ıgi ister az emes.
Dese de bıylǵy Joldaý tek aǵymdaǵy máselelerdi sheshý ǵana emes, sondaı-aq bolashaqqa qaraı boı túzegen isterdiń jospary bolyp sanalady. Bul baǵytta da talaı batyl da zamannyń talabyna saı mindetter qoıyldy.
Solardyń ishinde ózime erekshe unaǵan úsheýin ǵana atap ótkim keledi. Birinshisi, 2025 jylǵa qaraı jańadan 1000 mektep ashý. Ekinshisi, básekege qabiletti IT salasynyń 100 myń mamanyn daıarlaý. Úshinshisi, Qazaqstannyń 10 iri qalasyn, Almatyny qosqanda, ekologııaǵa zııandy kómirden gaz ben jasyl qýat kózderine aýdarý.
Rasýl JUMALY,
saıasattanýshy
