«Aqtaý Agro» JShS – Mańǵystaý oblysynda qus etin óndiretin eń iri jáne biregeı óndiris oshaǵy. Onda jylyna 5 myń tonna taýyq etin shyǵarý josparlanǵan. Atalǵan ınvestısııalyq joba óńirdiń qus etine degen qajettiligin 50%-ǵa jabýǵa múmkindik beredi. Bul ımportqa táýeldilikti eki ese azaıtady degen sóz.
Jobanyń jalpy quny – 5,1 mlrd teńge. Bul somanyń 30%-y otandyq ınvestorlardyń qarajaty esebinen, qalǵan bóligin «Báıterek» ulttyq basqarýshy holdınginiń «Agrarlyq nesıe korporasııasy» AQ qarjylandyrdy. Agrarlyq nesıe korporasııasy tarapynan qarjylandyrylǵan somma 3 mlrd 573 mln teńgeni qurady.
– Búgingi tańda qaryz alýshyǵa aınalym qarajatyn toltyrý úshin «Agrobıznes» baǵdarlamasy boıynsha 700 mln teńge somasyna kredıttik jeli ashyldy. Qalǵan 1 mlrd teńge mólsherindegi qarajat jobanyń barlyq nysandary iske qosylǵanda beriletin bolady. Agrarlyq nesıe korporasııasy árdaıym osyndaı jobalardy qoldaýǵa jáne qarjylandyrýǵa daıyn ekenin aıtqym keledi. Mundaı aýqymdy jobalar aımaqtyń ekonomıkasyn kóterýge yqpal etedi, – deıdi «Agrarlyq nesıe korporasııasy» AQ Mańǵystaý fılıalynyń bas mamany Shahrııar Djafarzade.
Osy jyldyń sáýir aıynda Mańǵystaýǵa Reseıden 38,5 myńǵa jýyq ınkýbasııalyq jumyrtqa ákelinip, qus fabrıkasy janyndaǵy ınkýbatorǵa jumyrtqalardyń alǵashqy partııasy salyndy. Sol mólsherdegi ekinshi partııa ınkýbatorǵa 16 kúnnen keıin taǵy salyndy. Osylaısha, broıler tuqymynyń alǵashqy balapandary sáýir aıynyń sońynda basylyp shyqty. О́sip-jetilgen qustardyń alǵashqy partııasy 28 mamyrda soıý sehyna jiberildi. Daıyn salqyndatylǵan ónim maýsym aıynyń sońynda «Kaspıı qusy» brendimen dúken sórelerine shyǵaryldy.
– О́nimniń ortasha salmaǵy shamamen 1,5-2 kılony quraıdy, al baǵasy bir kılo úshin 1200 teńge. Salqyndatylǵan ettiń basty ereksheligi – boıyndaǵy paıdaly dárýmenderi men mıkro jáne makroelementterin joǵaltpaıdy. Biz taýyq etin shyǵarǵannan bastap, tutynýshyǵa jetkenge deıin sapasyn baqylaımyz. Al bilikti mamandarymyz saqtaý merzimin jáne temperatýralyq rejimin qatań qadaǵalap otyrady, – deıdi kásiporyn basshysy D.Turǵynov.
«Aqtaý Agro» kesheni ınkýbator, 30 myńnan astam qusqa arnalǵan 16 qora jáne saǵatyna 2 myń qus soıýǵa qaýqarly seh syndy úsh alańnan turady. Búginde kásiporyn broılerdi ósirýge qajetti barlyq jabdyqtarmen qamtylǵan. Onyń ishinde ónimdi jiti baqylaıtyn veterınarlyq zerthana da bar.
Qus fabrıkasyndaǵy eń kúrdeli prosestiń biri – sehtyń óndiristik jumysy. Balapandar ınkýbatordan basylyp shyqqannan keıin qus ósiretin ortalyqqa ornalastyrylady. Qustar qajetti deńgeıge jetkende soıý sehyna jiberedi.
«Agrarlyq nesıe korporasııasy» AQ 2018 jyldyń shilde aıynda «Agroeksport» baǵdarlamasy boıynsha jobany 8% mólsherlememen 1 390 mln teńgege qarjylandyrý týraly sheshim qabyldady. 2020 jyly joba qaıta qaralyp, qosymsha qus qoralaryn, mal soıý sehyn jáne qurama jem zaýytyn salý týraly sheshimge keldi.
– Mańǵystaý oblysynda qus fabrıkasy syndy iri ınvestısııalyq jobalardyń iske qosylýy óńirdiń agroónerkásiptik keshenniń joǵary deńgeıge kóshkendiginiń kórinisi. Bul tek ekonomıkalyq ósý emes, áleýmettik qamtylýdyń bir kórinisi. О́ıtkeni taýyq eti halyq arasynda úlken suranysqa ıe. Taǵy bir mańyzdy jaıt – bul otandyq ári jergilikti ónim, – degen «Aqtaý Agro» JShS dırektory Danııar Turǵynovtyń aıtýynsha, qus sharýashylyǵy keshenin iske qosý óńirge 90-nan astam turaqty jumys ornyn ashyp otyr.
Kásiporyn dırektorynyń aıtýynsha, Mańǵystaý oblysynyń atqarýshy organdary jobany júzege asyrýda úlken qoldaý kórsetken. Jergilikti bıýdjet qarjysynan qus fabrıkasynyń ınfraqurylymy salyndy. Bul maqsatqa 1 mlrd teńgeden astam qarjy bólindi.
Budan bólek «Aqtaý Agro» JShS Munaıly aýdanynda qýattylyǵy saǵatyna 10 myń tonna jem shyǵaratyn qurama jem zaýytynyń qurylysyn júrgizip jatyr. Bul óndiris tek qus fermasynyń qajettilikterine ǵana emes, mal sharýashylyǵyna da jem shyǵarý josparlanǵan.
Mańǵystaý oblysy
