«Qazirgi ýaqytta Kishi Taldykól sýy óte las. Organıkalyq qosylystar shirip, qoqystyń jınalýy nátıjesinde ol jerden jaǵymsyz ıis taralyp, jándikterdiń (masalar, keneler) taralý oshaǵyna aınaldy. Kishi Taldykól – aǵyndy sý jınalǵan oryn, Úlken Taldykól kólimen tabıǵı baılanysy joq jáne jer ústi aǵyndary men jer asty sýlary arqyly ózara qosylmaıdy», dep jazady Nur-Sultan qalasy ákimdiginiń resmı saıty.
Zertteý nátıjesinde negizgi ıon (qattylyq, kalsıı, magnıı, hlorıd), aýyr metal (temir), ýly (ftor) jáne bıogendik zattardyń (ammıak azoty jáne nıtrıtter) normadan birneshe ese asatyny anyqtaldy. Sol sebepti sýdy sharýashylyq-aýyz sý, balyq sharýashylyǵy jáne rekreasııalyq maqsatta paıdalanýǵa bolmaıdy.
«Osylaısha, jaqyn mańdaǵy aýdandardyń turǵyndary úshin qaýipsizdik pen jaıly ómir súrý maqsatynda Kishi Taldykól zııandy zattardan tazartylmaq. 20 gektarǵa jaıylǵan Kishi Taldykól sý aıdyny (Syǵanaq kóshesiniń soltústigi, E22 kóshesiniń ońtústigi, Turan dańǵylynyń shyǵysy jáne Sh.Aıtmatov kóshesiniń batys jaǵy) saqtalatyn bolady. Sondaı-aq sý deńgeıin arttyrý úshin túbin tereńdetý jumystary júrgiziledi. Osylaısha, batpaqty jer tazartylǵan toǵanǵa, al mańaıy saıabaqqa aınalady», dep jazylǵan habarlamada.
«Sýly-batpaqty nysannyń irgeles bóligi ıgeriletin bolady. Onda áleýmettik nysandar ornalasady: turǵyn úıler, 2,5 myńǵa jýyq oqýshyǵa arnalǵan oqý orny, balabaqsha, medısınalyq ortalyq jáne t.b. Qala Úkimet qaýlysy boıynsha bekitilgen elordanyń bas josparyn iske asyrý aıasynda salynyp keledi. Bul qalanyń yqsham qurylysy. Mysaly, bir kezderi Turan dańǵyly, «Han Shatyr» SOO, «Zelenyı kvartal» TK aýmaqtary da batpaqty bolǵan», dep habarlaıdy elordanyń sáýlet, qala qurylysy jáne jer qatynastary basqarmasy.
Taldykóldiń (úlken Taldykól) óz ekologııalyq ınfraqurylymy bolatynyn atap ótken jón. Onyń janynda qoryq jáne orman-saıabaq aýmaǵy bar elimizdegi alǵashqy tabıǵı park ashylady. Al ekinshi ekopark – Maıbalyq kóliniń jany da (áýejaı baǵytynyń ońtústik-shyǵys jaǵy) tartymdy oryn bolady.
