Soltústik Koreıa lıderi Kım Chen Ynnyń buıryǵymen ólim jazasyna kesilgen jezdesi Chan Son Thektiń áýleti túgel qyrǵynǵa ushyrady. Bul týraly RIA «Novostı» agenttiginiń aqparyna silteme jasaǵan Ras.kz habarlady.
«KHDR-dyń birinshi joǵarǵy basshysy Kım Chen Ynnyń buıryǵy boıynsha Chan Son Thek otbasynyń barlyq músheleri, sonyń ishinde sábıler de bar – túgel ólim qushty», – delingen Soltústik Koreıadaǵy ahýaldan habary bar derekkózdiń habarlamasynda.
Agenttiktiń málimeti boıynsha, Chan Son Thektiń ápkesi Chan Ge Sýn KHDR-dyń Kýbadaǵy elshisi bolǵan Chon En Chjınmen birge, sondaı-aq Chan Son Thektiń Malaızııada elshi bolǵan nemere inisi Chan En Chhol ótken jylǵy jeltoqsanda jıyrma jastaǵy uldary Te Renmen jáne Te Ýnmen birge Phenıanǵa shaqyrtyp alynyp, atylyp ketken. Chan Son Thektiń eki inisi de erterekte aýyryp qaıtys bolǵan. Sondyqtan repressııa onyń ápkeleri men qaryndastaryn, sonyń ishinde olardyń kishkentaı nemerelerin de qamtyǵan. Agenttik habarlaǵandaı, ózderin ustaýǵa barǵan áskerılerge qarsylyq bildirgen Chan Son Thek týystary kórshileriniń kóz aldarynda, úıleriniń janynda atyp óltirilgen.
Sonymen birge ult lıderiniń jezdesine qandyq jaǵynan týys bolyp kelmeıtin áıelder aman qalǵan. Biraq olarǵa basqasha sharalar qoldanylǵan. Máselen, Chan En Chholdiń áıelin kúıeýinen zorlap ajyrastyryp, ózin Soltústik Koreıanyń alys aýdanyna jer aýdaryp jibergen.
Jeltoqsan aıynyń ortasynda uzaq ýaqyt Kım Chen Ynnyń regenti, ıaǵnı rýhanı ustazy ári memlekettegi ekinshi adam sanalyp kelgen 67 jastaǵy Chan Son Thek sottyń úkimi boıynsha atyldy. Keıin onyń áıeli, Kım Chen Ynnyń ákesiniń týǵan qaryndasy Kım Gen Hıdiń mıyndaǵy isikti alyp tastaýǵa arnalǵan otadan keıin es-tússiz jatqany habarlanǵan. Biraq bul áıeldiń sodan keıingi taǵdyry ne bolǵany aıtylmaı otyr.
Aıdar О́risbaev.
Derekkóz: Ras.kz
Foto: Bigmir.net
