Májilis tóraǵasy Nurlan Nyǵmatýlın parlamentter spıkerleriniń Besinshi Dúnıejúzilik konferensııasynda sóılegen sózinde Qazaqstan basshylyǵynyń aýqymdy reformalary, sondaı-aq zańnamalyq qoldaý elimizdi halyqaralyq ustanymdarǵa sáıkes damýyna múmkindik beretinin atap ótti.
Májilis tóraǵasy Nurlan Nyǵmatýlın bastaǵan parlamenttik delegasııa osy kúnderi Avstrııa astanasy Vena qalasynda ótip jatqan parlamentter spıkerleriniń besinshi dúnıejúzilik konferensııasyna qatysýda.
Májilis spıkeri kópjaqty yntymaqtastyqty nyǵaıtý, beıbitshilik pen turaqty damýdy qamtamasyz etý úshin parlamenttik qyzmet taqyrybyna arnalǵan ınteraktıvti jalpy pikirtalastarda sóz sóıledi.
Osy rette, Nurlan Nyǵmatýlın bizdiń elimizdiń halyqaralyq ustanymdarǵa sáıkes turaqty damýǵa jol ashatyn Qazaqstanda qolǵa alynyp jatqan mańyzdy bastamalar týraly aıtty. Palata spıkeri atap ótkendeı, Qazaqstannyń Tuńǵysh Prezıdenti Nursultan Nazarbaev yqpaldy memleket pen ádil qoǵam qurýdyń tujyrymdamalyq negizin qalady. Osy saıası baǵytty búginde Prezıdent Qasym-Jomart Toqaev jalǵastyryp keledi.
Nurlan Nyǵmatýlın qazaqstandyq qoǵamnyń barlyq salalaryn qamtıtyn aýqymdy júıeli reformalardy sóz ete kelip, qoǵamdyq baqylaý men azamattyq belsendilikti, sonymen birge el basshylyǵynyń bastamalaryn zańnamalyq qoldaýǵa basa nazar aýdardy.
«Parlament reformalardy der kezinde zań deńgeıinde qamtamasyz ete otyryp, belsendi qyzmet atqarýda. Máselen, saılaý zańnamasy men sot júıesin jetildirýge birqatar mańyzdy zańdar qabyldandy. Sonymen birge, saıası partııalar, beıbit jınalystar, jergilikti ózin-ózi basqarý týraly zańnamalyq aktilerge de kóptegen ózgerister engizildi», dedi Májilis Spıkeri.
О́z sózinde Nurlan Nyǵmatýlın Qazaqstannyń jahandyq jáne óńirlik deńgeılerde beıbitshilik pen qaýipsizdikti qamtamasyz etýge qosqan úlesine kóńil bóldi.
«Qazaqstan Prezıdenti Qasym-Jomart Toqaev zamanaýı syn-qaterlerge baılanysty tikeleı BUU Qaýipsizdik Keńesine esep beretin Bıologııalyq qaýipsizdik jónindegi halyqaralyq agenttik qurýdy usyndy. Bul mamandandyrylǵan qurylym bıologııalyq qaýipterdi boldyrmaýǵa yqpal etedi. Biz osy mańyzdy qazaqstandyq bastamany áriptesterimiz belsendi túrde qoldaıdy dep senemiz», dedi Májilis Spıkeri.
Sonymen qatar, Nurlan Nyǵmatýlın halyqaralyq kún tártibindegi Aýǵanstandaǵy beıbitshilik pen qaýipsizdikti qalpyna keltirý sııaqty ózekti másele týraly aıta kelip, búgingi tańda eń mańyzdysy – Aýǵanstandaǵy gýmanıtarlyq jáne azyq-túlik daǵdarysyna jol bermeý ekendigine nazar aýdardy.
Májilis spıkeri qazirgi ýaqytta Qazaqstan Prezıdentiniń sheshimi boıynsha Aýǵanstanǵa járdemdesý jónindegi BUU Mıssııasy bizdiń elimizde ýaqytsha ornalastyrylǵanyn atap ótti. Besinshi Dúnıejúzilik parlamentter spıkerleriniń konferensııasy koronavırýstyq pandemııa bastalǵannan beri tikeleı uıymdastyrylyp otyrǵan alǵashqy aýqymdy parlamentshiler forýmy.
Venadaǵy konferensııany Parlamentaralyq odaq, Avstrııa Parlamenti BUU-men birlesip uıymdastyrdy. Álemniń 90-nan astam eliniń parlamentter spıkerleri jınalǵan jıynda pandemııamen kúresý jáne covid-19-dan keıin qalpyna keltirý jónindegi jahandyq sharalardy qosa alǵanda, shuǵyl halyqaralyq parlamenttik is-qımyldy talap etetin basymdyqtar, klımattyń ózgerýi jáne ekologııalyq turaqtylyqty qamtamasyz etý máselelerin sheshý, jalǵan aqparat taratýǵa qarsy is-qımyl, jastardyń saıasatqa qatysýy, genderlik teńdik máseleleri qaraldy.
Qazaqstandyq Parlament ókilderi delegasııasynyń quramynda Senat pen Májilis depýtattary bar.
