Eýrazııalyq Medıa forýmy «Samruk-Kazyna Trust» qorynyń qoldaýymen ótedi. Is-sharada «ÚEU jáne áleýmettik storıtellıng úshin beınematerıaldar jasaý», «Synı oılaý nelikten sonshalyqty mańyzdy?» «Bolashaqty qalaı basqarýǵa bolady?», «BAQ aýdıtorııasy – ózara is-qımyl formattary», «Digital me: áleýmettik jelilerde otyrý ádetinen arylyp AI jáne sıngýlıarlyqqa kirýge deıin» jáne «Áleýmettik marketıng» sııaqty taqyryptar taldanady.
«Biz kommersııalyq emes uıymdardyń ókilderi, jýrnalıster, jýrnalıstıka fakýltetteriniń stýdentteri men basqa da múddeli mamandar forýmnyń sheberlik klastaryna onlaın qatysady dep kútemiz. Atalmysh sheberlik klastarynyń kún tártibin qazaqstandyq aýdıtorııaǵa arnap, olar medıa salasyndaǵy sońǵy trendter jaıly habardar bolýy jáne zamanaýı quraldardy jumysta paıdalana alýy úshin yńǵaılap jasadyq», dedi «Samruk-Kazyna Trust» áleýmettik jobalardy damytý qorynyń ókili Mıras Irgebaev.
Forým aıasynda «Túrki tildes elderdiń buqaralyq aqparattyq quraldary. Jańa shynaıylyq jaǵdaıynda yntymaqtastyqty damytý», «Jańa betburys: Aýǵanstandaǵy oqıǵalardyń Ortalyq Azııa aımaǵyna áseri qandaı bolýy múmkin?» jáne t.b. ózekti taqyryptar talqylanady.
«Dóńgelek ústelge bul taqyryptardy qosýǵa «Talıban» radıkaldy qozǵalysy Aýǵanstannyń búkil aýmaǵyna baqylaý ornatqanyn jarııalaǵan 15 tamyzdaǵy oqıǵalar túrtki boldy. El tarıhynyń qaıtyp oralmastaı ózgeriske qalaı ushyrap jatqanyn dúnıe júzi demin ishine tarta baqylap otyr. Biz bul máseleden qalys qalmaı, Ortalyq Azııa aımaǵynda oryn alyp jatqan osy oqıǵalardy talqyǵa salý úshin sarapshylar shaqyrdyq», dedi EAMF Bas dırektory Almagúl Ahmetjanova.
Dóńgelek ústeldiń spıkerleri Azııa zertteýleri ınstıtýtynyń dırektory Sultan Ákimbekov, О́zbekstannan «Ma’no» Zertteý bastamalary ortalyǵynyń dırektory Bahtııar Ergashev, AQSh-taǵy Pákistannyń burynǵy elshisi jáne Gýdzon ınstıtýtynyń Ońtústik jáne Ortalyq Azııa boıynsha aǵa ǵylymı qyzmetkeri jáne dırektory Hýseın Hakkanı, Tájikstannan saıası ǵylymdar kandıdaty Saımıdın Mırzoev bolady.
Dóńgelek ústeldiń moderatory - qazaqstandyq dıplomat, tarıh ǵylymdaryynń kandıdaty, Nursultan Nazarbaev Qorynyń halyqaralyq baǵdarlamalar ortalyǵynyń basshysy Qaırat Ábýseıitov.
EAMF-2021 kórermenderin «Qazaqstan táýelsizdiginiń 30 jyldyǵyna arnalǵan sessııa», «Pandemııa álemdi qalaı ózgertti jáne jahandyq ómir súrýdiń jańa baǵyttaryn qalaı anyqtady?!», «Aqparat kóp – shyndyq az», «Jasyl strategııa. Taǵy bir sońǵy múmkindik», «Ashýshańdyq dáýiri. Álemdi bılep turǵan kim?», «Medıa jáne tehnologııalar. 2021 trendteri», «Eńbek naryǵynyń bolashaǵy jáne bilim», «Oryndalǵan keleshek álemi» taqyrybynda 8 sessııa kútedi.
