Alleıanyń kireberisine mármártastan Táýelsizdik tuǵyry ornatylyp, oǵan Elbasynyń «Halyqtyń basty qundylyǵy – el táýelsizdigi» degen sózi qashalyp jazyldy. Al janynda bıik týtuǵyrǵa qondyrylǵan aıbyny asqaq kók baıraq kókpen talasa jelbirep tur. Demalys ornynyń aınalasyna qaraǵaı men jasyl jelekti shyrsha aralas aǵash kóshetteri otyrǵyzylyp, saıa jerde demalyp áńgime-dúken qurýǵa yńǵaıly oryndyqtar qoıylǵan.
«Táýelsizdik alleıasynyń» ashylý saltanatyna qala turǵyndary men Qostanaı aýdanynyń ákimi Jansultan Táýkenov, osy istiń qajetine qarjy bólip, qoldaý kórsetken kásiporyn basshylary qatysty.
«Táýelsizdiktiń 30 jyldyq belesinen oı júgirter bolsaq, osy ýaqyt aralyǵynda Qazaqstan Respýblıkasy talaı bıikti baǵyndyryp, álem elderiniń arasynan ózine laıyqty ornyn aldy. Búginde elimiz saıası-ekonomıkalyq turǵydan júıeli damyp keledi. Osynaý san salaly damý úderisine qosqan bizdiń aýdanymyzdyń da óz úlesi bar. Oǵan jaıqalyp ósken eginimiz, qamba toly astyǵymyz, osy astyqty óńdep, san túrli ónim shyǵaryp jatqan kásiporyndarymyz, jyl saıyn jańarǵan joldarymyz ben aýdan ortalyǵynda boı kóterip jatqan záýlim turǵyn úılerimiz, búgingi berekeli turmysymyz dálel bola alady. Búgin saltanatty túrde ashylyp otyrǵan «Táýelsizdik alleıasy» aýdanymyzdaǵy dıqandar men aýylsharýashylyq taýaryn óndirýshi kásiporyndardyń tikeleı qoldaýymen bitken dúnıe», dedi J.Táýkenov.
Saltanatty jıyn barysynda ákim aýdannyń ekonomıkalyq damýyna úles qosyp, el áleýmetiniń jaqsarýyna turaqty túrde demeýshilik kórsetip júrgen tórt kásipkerge «Jomart júrek» músinshesin tabys etti. Odan keıin minberge marapat ıeleri shyǵyp, jınalǵan kópshilikke ózderiniń jyly lebizderin bildirdi.
– Búgin qala turǵyndarynyń ıgiligine tapsyrylyp jatqan «Táýelsizdik alleıasyna» meniń de qatysym bar ekeni zor maqtanysh ekenin aıta ketkim keledi. Jańa alleıa Tobyl turǵyndary men qala qonaqtary jıi keletin jyly orynǵa aınalatynyna senimdimin. О́zim Ozernyı aýylynda turamyn, biraq Tobylǵa jıi kelemin. Endi otbasymdy, balalarym men nemerelerimdi osy alleıaǵa ertip kelip, serýendep sergip qaıtatyn bolamyn. Mereıtoıdyń shyraıyn syılyq ashady, el Táýelsizdiginiń 30 jyldyǵyna oraı biz bir top kásipker bolyp búgingi abat alańqaıdy aýdanymyzǵa mereıtoılyq tartý retinde syılaǵandy jón kórdik, – dedi «K.Marks atyndaǵy» seriktestiktiń basshysy Ivan Vechteın.
«Jomart júrek» syılyǵyna ıe bolǵandar qatarynda «BK-Qurylysóndirisi» JShS dırektory Sergeı Kım, «Shemınov» JShS basshysy Iýrıı Chehovskıı, «Nur Toba» seriktestiginiń dırektory Ermek Jumabekov te bar.
