Foto: kris_p_almata
Advokattyń túsindirýinshe, adam ólimine ákelgen jol apattary boıynsha taraptardyń tatýlasýy qylmystyq jaýapkershilikten bosatpaıdy. Zań shartty jaza taǵaıyndaýǵa tyıym salmaǵanymen, sot tájirıbesinde mundaı isterde ol sırek qoldanylady.
Qoldanystaǵy bap boıynsha jaza merzimi 7 jyldan 10 jylǵa deıingi bas bostandyǵynan aıyrýdy kózdeıdi. Alaıda aıyptalýshy keltirilgen shyǵyndy ótep, kinásin moıyndasa jáne aýyrlatatyn mán-jaılar bolmasa, sot kóbine shamamen 5 jyl jaza taǵaıyndaıdy.
Sondaı-aq mundaı sanattaǵy sottalǵandar ádette qonys-kolonııalarda jazasyn óteıdi. Bul mekemelerdegi tártip jalpy kolonııalarǵa qaraǵanda jeńilirek. Budan bólek, tergeý ızolıatorynda (SIZO) ótkizilgen bir kún qonys-kolonııadaǵy eki kún retinde esepteledi.
Johar Ýtebekovtiń aıtýynsha, sottalǵan adam jaza merziminiń tórtten birin ótegennen keıin qalǵan bóligin jeńilirek jaza túrine aýystyrýdy surap sotqa ótinish bere alady. Eger sot 5 jyl jaza belgilese, mundaı múmkindik shamamen 15 aıdan keıin týyndaıdy.
Buǵan deıin sot otyrysynda qaza tapqan eki adamnyń týystary aıyptalýshy Aleksandr Pakpen tatýlasqanyn málimdegen. Al úshinshi marqumnyń týystarynyń ustanymy ázirge tyńdalǵan joq. Kelesi sot otyrysy 4 maýsymǵa belgilengen.
Eske salsaq, qaıǵyly jol apaty 21 naýryz kúni Almaty qalasyndaǵy Ál-Farabı dańǵyly men Meńdiqulov kóshesi qıylysynda bolǵan. Tergeý málimetinshe, 32 jastaǵy kásipker Aleksandr Pak basqarǵan Zeekr kóligi qarsy baǵytqa shyǵyp ketip, Mercedes-Benz kóligimen soqtyǵysqan. Saldarynan úsh adam kóz jumdy.
