Bul týraly Memleket basshysy ınstagram paraqshasynda málimdedi.
«Senim gramotalaryn qabyldaý rásiminde, elshiler aldynda Qazaqstannyń Aýǵanstandaǵy ahýalǵa qatysty qabyldaǵan sheshimderine toqtaldym: «Aýǵanstandaǵy kúrdeli daǵdarys jaǵdaıynda Qazaqstannyń pragmatıkalyq syrtqy saıasaty mańyzdy bolyp otyr. Soǵystan toz-tozy shyqqan bul elmen ortaq shekaramyz bolmasa da, Almaty men Kabýldyń arasy ushaqpen bir-aq saǵattyq jer. Men TMD, Eýropalyq Odaq jáne Taıaý Shyǵystaǵy áriptesterimmen tyǵyz baılanysta otyrmyn. Eger osyndaı nıet bildiretin bolsa, sizderdiń memleketterińiz ben úkimetterińizdiń basshylarymen oı-pikir almasýǵa árqashan daıynmyn» dep jazdy Prezıdent.
Memleket basshysynyń aıtýynsha, ázirge Aýǵanstandaǵy dúrbeleń óńirlik qaýipsizdik problemalaryna nazar aýdartyp tur. Qazaqstan zorlyq-zombylyqtyń, zańsyz esirtki aınalymynyń jáne Aýǵanstannan tys jerlerge baqylaýsyz kóship ketýdiń aldyn alý maqsatynda bul elmen yntymaqtastyq ornatýǵa daıyn.
«Tálibter birtutas, ınklıýzıvti jáne ókiletti ulttyq úkimet qalyptastyryp, ózderiniń, shyn máninde, baısaldy pozısııa ustanatynyn jáne kelissózderge beıildi ekenin dáleldeıdi dep úmittenemin. Qazaqstan Aýǵanstannyń óz ishinde jáne kórshilerimen tatý-tátti, beıbitshilikte ómir súretin turaqty, egemen jáne birtutas memleket bolǵanyn qalaıdy. Biz elde qalyptasqan gýmanıtarlyq qıynshylyqtardy sheshý úshin konstrýktıvti iskerlik baılanystar ornatýǵa daıynbyz. Halyqaralyq qoǵamdastyq Aýǵanstandy qazirgideı daǵdarys kezinde qıynshylyqtarmen betpe bet qaldyrmaýy kerek. Kerisinshe, biz bolashaqta Aýǵanstannyń ekonomıkalyq jáne ornyqty damýy úshin barlyq is-áreketterimiz ben josparlarymyzdy jumyldyrýymyz kerek», dep túıdi sózin QR Prezıdenti.
