Saltanatty sharaǵa garnızonnyń, qalanyń qorǵanys isteri jónindegi departamentiniń áskerı qyzmetshileri, Radıoelektronıka jáne baılanys Áskerı ınstıtýtynyń kýrsanttary, qalalyq ákimdik pen ardagerler keńesiniń ókilderi qatysty. Týǵan kún ıesine Qazaqstan Respýblıkasy Qorǵanys mınıstriniń atynan quttyqtaý haty tabys etildi.
Radıoelektronıka jáne baılanys Áskerı ınstıtýty orkestriniń súıemeldeýimen kýrsanttar men desantshylar saltanatty marshpen ótti.
«Aspanymyz beıbit bolýy úshin olardyń qandaı úlken úles qosqanyn eshqashan umytpaýymyz kerek», dedi Almaty qalasy boıynsha ardagerler keńesiniń tóraǵasy Melıs Shámpıev.
Qaıyrly Jonqabaevtyń úıiniń janynda da mýzykamen qarsy aldy. QR Ulttyq ulanynyń 5571 áskerı bóliminiń orkestri áskerı jyldardyń marshtary men ánderin oryndady.
Qaıyrly Jonqabaev uzaq ómir súrý qupııasymen bólisti.
«Ata-anam maǵan jaqsy tárbıe berdi. Men sportpen aınalystym, jaman ádetterim bolmady. Úılengennen keıin bes bala tárbıelep ósirdik, olardyń árqaısysy joǵary bilim aldy. Qazir balalarymnyń, nemerelerimniń jáne shóberelerimniń arasynda baqytty ómir súremin, olar maǵan jaqsy kútim jasaıdy. Sondyqtan odan da uzaq ómir súrgim keledi», deıdi ol.
Ardager 1921 jyly 10 qyrkúıekte Shyǵys Qazaqstan oblysy Samar aýdanynda dúnıege kelgen. Ol 1941 jyldyń qyrkúıeginde Panfılov dıvızııasynyń 23 gvardııalyq polkiniń qataryna maıdanǵa shaqyryldy. Qaıyrly Jonqabaev soǵystyń ár kúnin kórip ótti.
Ol 8 gvardııalyq atqyshtar dıvızııasy quramynda Belarýs, Polsha jáne Estonııany azat etýge qatysty, Keńes Odaǵynyń Batyry Málik Ǵabdýllınmen bir rotada qyzmet etti. 1943 jyly aqpanda Rjev shaıqasynda jaraqat aldy. Jeńisti Drezdende qarsy aldy.
Uly Otan soǵysy jyldarynda maıdanger kórsetken erligi men batyldyǵy úshin ol «Qyzyl juldyz» jáne «Otan soǵysy» ordenderimen, «Erligi úshin» jáne «Máskeýdi qorǵaǵany úshin» medaldarymen marapattaldy.
Soǵys aıaqtalǵannan keıin ol Samar aýdandyq atqarý komıtetiniń jalpy bóliminiń meńgerýshisi bolyp jumys istedi, aýdandyq tutynýshylar odaǵy júıesinde basshylyq laýazymdardy atqardy, sondaı-aq Almatydaǵy qoǵamdyq tamaqtaný júıesinde sharýashylyq eseptiń dırektory boldy.
1983 jyly Qaıyrly Jonqabaev zeınetke shyqty. Ol bes balasyn, 10 nemeresi men 13 shóberesin jetildirdi.
Uly Jeńis kúninen 75 jyldan astam ýaqyt ótse de, Otanymyzdy fashıstik Germanııadan qorǵaǵan erlik umytylmaıdy.
