Derek boıynsha bul elde ár ekinshi bala toıyp tamaq ishpeıdi. О́ıtkeni tálipter bılikti qolǵa alǵaly Aýǵanstanda ekonomıkalyq daǵdarys ornady. Buryn da kómekke zárý elge qazir kóptegen memleket jáne uıymdar kómek kórsetýden bas tartyp, valıýta qoryn buǵattap tastady. Endi mıllıondaǵan adamǵa asharshylyq qaýpi tónip tur. Onyń ústine bıyl elde qýańshylyq bolyp, egistiń 40 prosenti kúıip ketken.
«Eldiń basym bóligi azyq-túlik ımportyna táýeldi. Ásirese bıdaı uny men nanǵa. Al valıýta qory bolsa buǵatta tur. Memlekettik bıýdjet tapshylyqtan turalap qalǵan. Bankter azamattarǵa qolma-qol aqsha berýdi toqtatqan. Azyq-túlik pen janarmaı baǵasy bolsa qymbattap jatyr», deıdi Dúnıejúzilik azyq-túlik baǵdarlamasy Azııa-Tynyq muhıty óńiriniń aımaqtyq dırektorynyń orynbasary Anteıa Ýebb.
