Qoǵammen baılanys departamentiniń habarlaýynsha, Qor jáne portfeldik kompanııalardyń ókilderi «SberÝnıversıtet» korporatıvtik ýnıversıtetinde Sberbanktiń bıznes-ekojúıelerin qalyptastyrý tájirıbesi men tehnologııalyq sheshimderimen tanysty. Taraptar qarjylyq tehnologııalardy damytý joldary men qarjy ınstıtýtynyń sıfrly ónimderi jáne ınfraqurylymdyq, platformalyq qyzmet túrlerin talqylady.
Jahandyq trendter men bolashaq baǵdaryna saı «Samuryq-Qazyna» AQ jeke bıznes-ekojúıelerin qalyptastyryp, jańa, qarjylyq emes jáne densaýlyq saqtaý, energetıka, sýmen qamtý, robototehnıka jáne sıfrly qaýipsizdik salalaryndaǵy áleýmettik mańyzy bar qyzmetterdi damytýdy qolǵa almaq. Mail.ru jáne Yandex tehnologııalyq kompanııalarynyń basshylyǵymen kelissózder barysynda taraptar ózara tıimdi seriktestik máselelerin talqylap, málimetterdi óńdeý ortalyqtarynyń ınfraqurylymyn, «jasyl ekonomıka» jáne málimetterdi saqtaý tehnologııalaryn damytý joldaryn pysyqtady.
Kelissózderdiń qorytyndysy boıynsha QazCloud JShS Mail.ru. Sıfrlyq tehnologııalar» kompanııasymen memorandýmǵa qol qoıdy. Qujatqa sáıkes, qazaqstandyq kompanııalar Mail.ru Cloud Solutions platformasyna qol jetkize alady.
QazCloud JShS bas dırektory Qasym Esergepov atap ótkendeı, búgingi tańda ashyq qody bar málimetterdi saqtaý platformalaryna degen suranys arta túsken. Bul iri ınvestısııalardy qajet etpeı, sıfrly jobalardy jyldam júzege asyrýǵa múmkindik beretin jańa qyzmetter platformalaryn (PaaS) qoljetimdi etedi.
