Sarapshylar sybaılas jemqorlyqqa qarsy is-qımyldyń quqyqtyq negizin jáne qoldanystaǵy sybaılas jemqorlyqqa qarsy tetikterdi baǵalaıdy. Immýnıtetterdi alyp tastaý, sybaılas jemqorlyq kiristerin tárkileý, memlekettik organdardyń ashyqtyǵy, memlekettik qyzmetshilerdiń ádebi jáne sybaılas jemqorlyq úshin zańdy tulǵalardyń jaýapkershiligi máselelerine erekshe nazar aýdarylady.
Esterińizge sala ketsek, GREKO Eýropa Keńesiniń sybaılas jemqorlyqqa qarsy is-qımyl jónindegi organy. Ol halyqaralyq sharttarda bekitilgen standarttardy saqtaý jáne tıimdi qoldanýǵa jaýap beredi.
Bıyl naýryz aıynan bastap sarapshylar qazaqstandyq zańnamany zerdeledi. Osy saparda sheteldik baǵalaýshylar memlekettik organ ókilderimen, ÚEU, BAQ jáne kásibı qaýymdastyq ókilderimen kezdesti.
Sybaılas jemqorlyqqa qarsy is-qımyl agenttiginiń Tóraǵasy Marat Ahmetjanov sapardyń birinshi kúni áriptesterine Qazaqstannyń sybaılas jemqorlyqqa qarsy júıesi týraly baıandady. Sondaı-aq, Bas Prokýratýra qyzmetkerlerimen birlesip «Sotqa deıingi tergeýlerdiń biryńǵaı tizilimi», «Ákimshilik óndiristerdiń biryńǵaı tizilimi», «Tekserýler sýbektileri men obektileriniń biryńǵaı tizilimi» júıeleri jáne «Qamqor» aqparattyq servısi tanystyryldy.
Sarapshylardyń qazaqstandyq zańnama men praktıkanyń erekshelikterin neǵurlym tolyq túsinýin qamtamasyz etý úshin Parlament, Ulttyq qaýipsizdik komıteti, Qarjy monıtorıngi jáne Memlekettik qyzmet isteri jónindegi agenttikter, Esep komıteti, Joǵarǵy Sot, Bas Prokýratýra, ádilet, qarjy, ishki ister mınıstrlikteri jáne ákimdikterdiń qatysýy uıymdastyryldy.
Kezdesýler barysynda alynǵan aqparatty qorytý nátıjeleri boıynsha sybaılas jemqorlyqqa qarsy is-qımyl sharalaryn jetildirý jónindegi usynymdarmen birge baǵalaý esebi jasalady.
Usynymdar tizbesi kelesi jyldyń naýryz aıynda GREKO-nyń plenarlyq otyrysynda bekitiletin bolady. Ony oryndaý úshin Qazaqstanǵa 18 aı beriledi.
Usynymdardy sapaly oryndaý Eýropa Keńesiniń sybaılas jemqorlyq úshin qylmystyq jaýapkershilik týraly konvensııasyn jáne birqatar basqa da mańyzdy halyqaralyq sharttardy ratıfıkasııalaýǵa jol ashady.
«Olarǵa qosylý qylmyskerlerdi ekstradısııalaý jáne shetelge shyǵarylǵan aktıvterdi qaıtarý bóliginde sheteldik áriptestermen neǵurlym tıimdi yntymaqtasýǵa múmkindik beredi», dep jazady Sybaılas jemqorlyqqa qarsy is-qımyl Agenttigi.
