Búginde «Astana Opera» Kameralyq zaly – kóptegen mýzykanttar óner kórsetýge umtylatyn elimizdiń bedeldi konserttik alańy. Bul zal klassıkalyq murany saqtaıtyn jáne jańarǵan qazaqstandyq qoǵamnyń rýhanı suranystaryn iske asyratyn qazaq jáne álemdik mýzyka mádenıeti dástúrleriniń tasymaldaýshysy bolyp tabylady.
«Bul sahnada Qazaqstannyń ǵana emes, búkil álemniń ataqty ártisteri óner kórsetýde. Kameralyq zaldyń Kúlásh Báıseıitova zaly dep atalýy biz úshin úlken qurmet. Ol «KSRO Halyq ártisi» joǵary ataǵynyń alǵashqy ıegerleriniń biri. Biz onyń tabıǵı mýzykalyq talantyn jáne álemdik mádenıettiń qazynasynda qaldyrǵan beınelerdiń baı galaktıkasyn esimizde saqtaımyz. Al E.G.Brýsılovskııdiń «Qyz Jibek» operasyndaǵy Jibek partııasy ánshige klassıkalyq opera óneriniń bıikterine kóterilýge múmkindik berdi», dedi Qazaqstannyń eńbek sińirgen qaıratkeri, «Astana Opera» dırektory Ǵalym Ahmedıarov.
Oqıǵa qarsańynda Kúlásh Báıseıitovanyń qyzy Qarlyǵash Báıseıitova óziniń balalyq shaǵy týraly jyly estelikterimen bólisti. Ol elordanyń mádenı ómiri úshin «Astana Opera» Kameralyq zalynyń aty ańyzǵa aınalǵan tulǵa Kúlásh Báıseıitovanyń esimimen atalýy úlken qýanysh ekenin atap ótti. Qyzy anasyna alǵys hattarynyń birneshe kóshirmesin, sondaı-aq uly ánshiniń jeke muraǵatynan alynǵan fotosýretti teatrdyń art-galereıasyna tapsyrdy. 13 qyrkúıekte teatr foıesinde aıtýly oqıǵaǵa oraı kórme ótedi.
