Aǵylshyn tilin úıretetin ortalyqtardyń jumysy jandana bastady. Oblys ortalyǵynda ǵana emes, shalǵaıdaǵy shaǵyn aýyldarda da til úıretetin ortalyqtardyń aqysy da tym qymbat emes, nebári 6 myń teńgeniń tóńireginde. Jas Otan jastar qanaty «Bolashaq» qaýymdastyǵymen birlesip, aǵylshyn tilin úırenýdiń jańa jobasyn usynýda. Jobany iske asyrýdyń tájirıbeden ótkizilgen tolymdy tásili – 6-9 synyp oqýshylary úshin aptasyna úsh ret aǵylshyn tiliniń qosymsha kýrstaryn ótkizý. Bir aıta keterligi, til úırený sabaqtarynda oqýshynyń oı-órisin keńeıtetin ári qyzǵylyqty tanymdyq oıyndar men trenıngter ótkizý josparlanǵan.
– English for jastar jobasy boıynsha aǵylshyn tilin úırený sabaqtary qolǵa alynyp otyr, – deıdi Aqkól orta mektebi dırektorynyń orynbasary Gaýhar Qabdolova. – Tyń dáris mektep oqýshylaryna óte unaıdy. Balalardyń tildi meńgerýge degen yqylasy da jaqsy. О́mirdiń ózi talap etip otyrǵan úrdisten shet qalmaǵanymyz oń emes pe?
Jas Otan jastar qanaty oblystyq fılıalynyń ádiskeri Aleksandra Gomonovanyń aıtýyna qaraǵanda, joba jumysy ótken aptada bastalǵan. Aýyl mektepteriniń joǵaryda atalǵan synyptaryn qamtymaq. Negizgi maqsat – aǵylshyn tilinde bilimderin jetildirý. Jobaǵa on aýdannan 15 erikti jumyldyrylyp otyr.
– Bul joba balalarǵa aǵylshyn tilin úıretý úshin qolǵa alynyp otyr, – deıdi joba eriktisi Móldir Bolat. – Balalardyń qyzyǵýshylyǵyn arttyrý úshin aǵylshyn tilindegi tanymdyq fılmder de kórsetiledi, ánder de tyńdalady.
Aýyl men qala mektepteriniń arasyndaǵy bir aıyrmashylyqtyń, anyǵyraq aıtqanda, bir olqylyqtyń orny osylaı tolyqtyrylmaq. О́z ana tilderin jap-jaqsy biletin aýyl balalary zaman talabyna saı aǵylshyn tilinde til syndyryp jatsa nesi aıyp?! Joba aldaǵy ýaqytta keńirek qanat jaıý úshin el erteńin oılaıtyn eriktiler de tartylmaq.
Aqmola oblysy
