Jarystyń ashylý saltanatyna Mádenıet jáne sport mınıstri Aqtoty Raıymqulova jáne birqatar mártebeli meımandar arnaıy kelip qatysty.
Aıta ketý kerek, atalǵan týrnır Halyqaralyq ústel tennısi federasııasynyń (ITTF) TMD elderi aýmaǵynda bıyl uıymdastyrǵan jalǵyz reıtıngtik jarys boldy.
«Bıyl Qazaqstan ústel tennısi federasııasy ITTF aıasynda dúbirli de bedeldi dodalardy dástúrli túrde ótkizýge nıetti ekenin jarııalaıdy. Tájirıbe kórsetkendeı, bul aımaqtardaǵy materıaldyq-tehnıkalyq bazany nyǵaıtýmen birge, respýblıkadaǵy eń aýqymdy olımpııalyq sport túrleriniń birin damytýǵa qosymsha yntalandyrýdy qamtamasyz etedi. Biz Kazakhstan Open dodasyn jyl saıyn ótkizýdi josparlap otyrmyz», dedi týrnır aldynda Qazaqstan Ústel tennısi federasııasynyń prezıdenti Danııar Ábilǵazın.
Dúbirli doda qorytyndysy boıynsha erler arasyndaǵy synda, buǵan deıin habarlanǵanyndaı, otandasymyz, el ústel tennısiniń kóshbasshysy Kırıll Gerasımenko top jardy. Al áıelder arasyndaǵy tartysty básekede reseılik Valerııa Kosıýrdiń joly boldy. Ekinshi júlde de reseılik Ekaterına Ohotnıkovaǵa buıyrsa, qola medalǵa qazaqstandyq Aııa Álimbaeva qol jetkizdi.
Erler arasyndaǵy juptasyp óner kórsetý synynda Kırıll Gerasımenko men qaraǵandylyq jas talant Alan Qurmanǵalıevqa teń keler qarsylas bolmady. Reseılik jup Valerııa Kosıýr men Valerııa Sherbatyh áıelder arasyndaǵy saıysta myqtylyǵyn moıyndatty. Al qaraǵandylyq Záýresh Aqasheva men Sarvınoz Mırkadırova bolsa, júldeli úshinshi oryndy jeńip aldy.
Aralas juptar arasyndaǵy ótken tartysta Reseıden kelgen Valerııa Kosıýr men Maksım Kabýrkın juby jeńis tuǵyrynyń eń bıik satysyna kóterildi. Bul synda qazaqstandyq tennısshiler de júldesiz qalmady. Atap aıtqanda, Erık Raıter men Araı Áshkeeva juby qola júldege ıe boldy.
Sóıtip, tartysty ótken týrnırde Qazaqstan qurama komandasy eki altyn jáne úsh qola jeńip alyp, sátti óner kórsetti.
Atalǵan týrnırge kelgen qonaqtar men qatysqan sportshylar dúbirli dodanyń óte joǵary deńgeıde ótkenin biraýyzdan atap ótti. Jalpy, sońǵy jyldary Qaraǵandy oblysynda ústel tennısi qarqyndy túrde damyp keledi dep aıtýǵa berik negiz bar. Naqtyraq aıtqanda, osy sport túriniń óńirlik federasııasyna jetekshilik etetin oblys ákimi Jeńis Qasymbektiń qamqorlyǵynyń arqasynda ústel tennısi sheberleriniń jarystarǵa alańsyz da tyńǵylyqty daıyndalýyna barlyq jaǵdaı jasalǵan.
Al byltyr Memleket basshysynyń ózi ashqan Saryarka zamanaýı tennıs ortalyǵy halyqaralyq deńgeıdegi kez kelgen jarysty ótkizýge múmkindik beredi. Mysaly, jalpy aýmaǵy tórt myń sharshy metr bolatyn bul nysanda 18 tennıs ústeli qoıylǵan oıyn bólmesi jáne Halyqaralyq ústel tennısi federasııasynyń barlyq tehnıkalyq talaptaryna sáıkes keletin toǵyz tennıs ústeli bar jattyǵý zaly bar. Sondaı-aq munda keshendi daıyndyqqa arnalǵan jattyǵý zaldary, medısınalyq kabınet, sportshylarǵa arnalǵan demalys bólmeleri, tóreshiler men bapkerler bólmeleri, konferens-zaldar men fýdkort qarastyrylǵan.
Qaraǵandy oblystyq dene shynyqtyrý jáne sport basqarmasynyń basshysy Temirhan Abylaevtyń aıtýynsha, qazirgi ýaqytta óńirde ústel tennısimen aınalysýshy balalar men jastardyń qatary kóbeıip keledi. «Oblys ortalyǵynda jańa tennıs ortalyǵynyń salynýy sporttyń osy túriniń damýyna úlken serpin berdi. Osy baǵyttaǵy jumystarǵa barynsha qoldaý kórsetip otyrǵan oblys basshylyǵyna degen alǵysymyz mol», deıdi ol.
Elimizdegi jáne oblystaǵy kúrdeli epıdemıologııalyq jaǵdaıǵa baılanysty, jarystyń kórermensiz ótkenin aıta ketken lázim. Esesine, bul ITTF Kazakhstan International Open-2021 týrnırin Qazsport telearnasy men Halyqaralyq ústel tennısi federasııasynyń resmı saıty tikeleı efırde kórsetti.
