Sýretti túsirgen J.Jumabekov
Májilis Spıkeri Nurlan Nyǵmatýlın halyqaralyq uıymǵa tóraǵalyq etýdi erekshe qurmetpen qabyldap alyp, bul bizdiń el úshin úlken mártebe jáne zor jaýapkershilik ekenin alǵa tartty. Osy oraıda Palata Spıkeri baýyrlas ázirbaıjan halqyna shyn júrekten alǵys bildirdi.
«Túrki Keńesiniń otyrysynda Qazaqstannyń Tuńǵysh Prezıdenti, Elbasy, TúrkPA-nyń negizin qalaýshy, túrki Keńesiniń Qurmetti Tóraǵasy Nursultan Nazarbaev osy Keńesti tolyqtaı halyqaralyq uıymǵa ózgertý týraly bastama kótergen bolatyn», dedi Májilis Tóraǵasy.
Palata Spıkeriniń aıtýynsha aldymyzda qarasha aıynda Ystambýlda ótetin Túrki Keńesiniń kezekti otyrysynda Memleket basshylary tıisti sheshim qabyldaıdy dep kútilýde. Sonymen qatar, eger sondaı sheshim qabyldansa, Assambleıanyń ataýyn Túrki memleketteriniń Parlamenttik Assambleıasy dep ózgertýdi usynatynyna toqtaldy.
«Aldaǵy bir jyl ishinde biz qalyptasqan muragerlikti saqtaı otyryp, elderimizdiń arasyndaǵy baılanysty odan ári tereńdetý, parlamentaralyq yntymaqtastyqty nyǵaıtý, Assambleıa aıasyn keńeıtý jáne halyqaralyq bedelin arttyrý jolynda birlese eńbek etetin bolamyz», dedi Nurlan Nyǵmatýlın.
Sonymen qatar, Májilis Tóraǵasy bıylǵy jyl Qazaqstan, Ázerbaıjan jáne Qyrǵyzstan úshin erekshe tarıhı kezeń ekenin, memleketterimizdiń táýelsizdigine 30 jyl tolatynyn atap ótti.
«Bul ýaqyttyń ishinde elderimiz kóptegen qıyndyqtardy jeńip qana qoımaı, úlken tabystarǵa, aıtýly jetistikterge jetti. Oǵan bizdiń Parlamenttik Assambleıanyń da qosyp jatqan úlesi óte zor», dedi Nurlan Nyǵmatýlın.
Aıta ketý kerek, uıym qurylǵan kúnnen bastap, ózara is-qımyldy kúsheıtýge, memleketaralyq baılanysty nyǵaıtýǵa, elderimizdiń halyqaralyq bedelin arttyrýǵa, aımaqtyq qaýipsizdikti qamtamasyz etýge úlken úles qosyp keledi.
