Qazaqstannyń Tuńǵysh Prezıdenti elordada týrıstik, mádenı jáne áleýmettik jańa nysandar salý josparymen tanysty.
Altaı Kólginov aýdandar qurylysynyń barysy, qalany kógaldandyrý prosesi jaıly, sonymen qatar densaýlyq saqtaý, mektepke deıingi jáne orta bilim berý nysandarynyń, sport ǵımarattary men kommersııalyq oryndardyń halyqqa qoljetimdiligin qamtamasyz etý úshin qabyldanyp jatqan sharalar týraly egjeı-tegjeıli baıandady.
Sondaı-aq Elbasy nazaryna elordanyń jańa meshiti men EKSPO aýdanyna irgeles aýmaqta júrgiziletin qurylys pen abattandyrý jobalary usynyldy.
– Men úshin bul qalanyń orny bólek. Onyń damý barysyn únemi qadaǵalap otyramyn, bolashaǵy týraly kóp oılanamyn. Alǵashynda jańadan qala salý jobasyna ǵana emes, osy mańaıda qalyń orman ósetinine de kúmánmen qaraǵandar bolǵan. Keıbir ǵalymdar bul jerge aǵash óspeıdi degen edi. Alaıda elorda az ýaqyt ishinde aınalasyn «Jasyl beldeý» qorshaǵan iri megapolıske aınaldy, – dedi Elbasy.
