Jyl saıynǵy jyr

Keıde eriksiz bas shaıqatar jaılar bar. О́tken kúz berekesine óndiristi óńir jurtshylyǵynyń qýanyshynda shek bolmaǵandaı edi. Sońǵy shırek ǵasyrda ushyrasyp kórmegen kól-kósir astyq  jınalýy el kóńilin bir ósirse, kartoptan da buryn-sońdy bolmaǵan ónim alynýy taǵy mereılendirgen-di. Azyq-túlik túrlerine kenelýge baılanysty, eń bas­tysy, baǵasy shamaǵa shaq bolýy kútilgen-tin. Iá, ne nárse jetkilikti bolýyna oraı saýdanyń ejelden bar zańdylyǵy boıynsha quny qalyptan aspaýǵa tıis  emes  pe? Tutynýshylar úmiti de sol bolatyn. Olaı bolmady. Kerisinshe, baǵa taǵy shyrqap shyǵa keldi. Un, kartop, kókónis, et jáne basqa da taǵamdar dúkender men bazarlarda asyp-tógilgenimen, baǵasy qazir byltyrǵydan 15-20 paıyzǵa qymbat. Munymen de qoımaı kúnnen-kúnge ósýi toqtalar emes. Astarynda ne syr baryn bilý qıyn, ony baqylaýshylardyń qaýqarsyzdyǵy túsiniksiz. Muny aıtý sebebimiz, búginde baǵany turaqtandyrý jóninde komıssııalar qurylǵan ústine  qurylyp, onyń tizginin  bosatpaý úshin tıisti taraptar arasynda memorandýmdarǵa qol qoıylyp jatyr. Bul jyl saıynǵy úrdis. Biraq qaıyry shamaly. Bıyl da solaı bolyp qalmaqtyǵy álden-aq belgili jaǵdaı. Áleýmettik dúkender ashý sııaqty bastalmaı jatyp aıaqsyz qalatyn shalajansar sharalar birine biri ulasýda. Jyl qorytyndysy talqyǵa salynǵan oblystyq  jıynda da bul másele aıtylmaı qalmady. Jyl saıynǵy jyr osy. Aıtylady da qalady. Aıqyn NESIPBAI, «Egemen Qazaqstan». QARAǴANDY.