Bederli jyldar belesinde memleket ómirindegi mańyzdy qurylymdarda jaýapty qyzmetter atqarǵan ǵıbratty ǵumyr ıesiniń qaıratkerlik joly keıingiler úshin ólmes ónege. Almatydaǵy Qonaev pen Qurmanǵazy kósheleriniń qıylysynda oryn tepken bul úıde Telman Erkinbekulynyń ǵylym men qoǵamdyq qyzmettegi eń bir jemisti jyldary ótken. Memorıaldy taqtanyń ashylý rásimine zııaly qaýym ókilderi, marqumnyń týystary men jaqyndary qatysty.
«Halyqqa adal qyzmet etip, kóptiń alǵysyna bólený shyn baqyt. Telman Erkinbekuly sanaly ǵumyryn, bar qajyr-qaıratyn el ıgiligine jumsaǵan jan edi. Ol jurtshylyqtyń esinde qaı bıikke shyqsa da qarapaıym qalybynan jańylmaǵan degdar azamat retinde saqtalyp qaldy. Azamattyqtyń aınasyna aınalǵan aǵanyń aqjarqyn kóńili, atqarǵan eńbegi kóz aldymyzda. Ol halyqshyl adam bolatyn. Almaty onyń ómiriniń bir bólshegi boldy desek qatelespeımiz. Keshegi keńes kezinde Almatyny basqaryp, qalanyń qaryshtap damýyna kóp eńbek sińirdi. О́miriniń teń jarymy ótken úıde beınesi jarqyrap, esimi qashalyp turǵany qandaı jaqsy», deıdi qoǵam qaıratkeri Erjanbek Nurbekov.
Is-sharaǵa jınalǵandar Telman Erkinbekulynyń jastardy kásibı sheberlikke, adamgershilik qundylyqtarǵa baýlyǵanyn, ózi qyzmet atqarǵan qaı salada da abyroı bıiginen kórinip, qaıratkerliktiń jarqyn úlgisi bola bilgenin iltıpatpen eske aldy. Memlekettik qyzmetten bólek ult tarıhy, urpaq tárbıesine qatysty kez kelgen máseleniń ortasynan tabylǵan halqynyń adal perzenti el jadynan óshpeıtinin jetkizdi.
Telman Saýranbekov (1941-2020) Jambyl oblysy, Jýaly aýdanynda ómirge kelgen. Qazirgi Abaı atyndaǵy Qazaq ulttyq pedagogıkalyq ýnıversıtetiniń tarıh fakýltetin bitirgen (1962). Eńbek jolyndaǵy qadamyn aýdandyq Pıonerler úıiniń ádiskeri, pıoner lageriniń tárbıeshisi bolyp bastady. 1962 – 65 jyldary Almaty qalasy Sovet aýdany komsomol komıtetiniń birinshi hatshysy, 1969 – 72 jyldary Almaty qalasy komsomol komıtetiniń birinshi hatshysy, 1972–76 jyldary BLKJO Ortalyq komıtetiniń jaýapty uıymdastyrýshysy, 1976–84 jyldary Qazaqstan LKJO Ortalyq komıtetiniń hatshysy, 1984 – 86 jyldary Almaty qalasy partııa komıtetiniń hatshysy, 1986 – 90 jyldary Qazaqstan Kompartııasy OK-nyń sheteldermen baılanys jónindegi bóliminiń meńgerýshisi, KSRO Mınıstrler keńesiniń Qazaq KSR-i boıynsha din isteri jónindegi ókiletti ókili, 1990 – 95 jyldary QR Prezıdent apparaty men Mınıstrler Kabınetiniń hat jáne azamattardy qabyldaý bóliminiń meńgerýshisi, 1995 – 97 jyldary QR Úkimet janyndaǵy din isteri jónindegi keńes tóraǵasynyń orynbasary, 1997 jyldan QR Parlamentiniń Senat Apparatynyń jalpy bóliminiń meńgerýshisi qyzmetterin abyroımen atqardy. Qazaq KSR Joǵarǵy Keńesiniń (11-shaqyrylǵan) depýtaty bolyp saılandy. «Qurmet Belgisi» ordeniniń ıegeri.
