Nur-Sultan qalasyndaǵy «Astana-Arena» stadıonynda ótken jarysqa Ázerbaıjan, Qyrǵyzstan, Majarstan, Túrkııa, Túrikmenstan, О́zbekstan elshilikteriniń, halyqaralyq uıymdardyń, atap aıtqanda Halyqaralyq Túrki akademııasy, Azyq-túlik qaýipsizdik ıslam uıymy (IOFS), Azııadaǵy ózara is-qımyl jáne senim sharalary keńesi (SICA) jáne Syrtqy ister mınıstrliginiń qurama komandalary qatysty.
Týrnırdiń ashylýynda sóz sóılegen Qazaqstan Respýblıkasy syrtqy ister mınıstriniń birinshi orynbasary Shahrat Nuryshev jarysqa qatysýshylarǵa sáttilik tiledi. Al Túrki akademııasynyń basshysy D. Qydyráli bıyl baýyrlas elderdiń táýelsizdigimen birge Túrki ıntegrasııasyna da 30 jyl tolyp otyrǵanyn atap ótti.
Týrnır qorytyndysy boıynsha birinshi oryndy Majarstannyń Qazaqstandaǵy elshiligi ıelendi. Ekinshi oryn elimizdiń Syrtqy ister mınıstrliginiń komandasyna buıyrdy. Úzdik úshtikti Halyqaralyq Túrki akademııasynyń komandasy túıindedi.
Aıta ketý kerek, Túrki keńesi Qazaqstan Respýblıkasynyń Tuńǵysh Prezıdenti – Elbasy, Túrki keńesiniń Qurmetti tóraǵasy Nursultan Nazarbaevtyń bastamasymen 2009 jyly 3 qazanda qurylǵan bolatyn. Bul tarıhı kún «Túrkitildes elderdiń yntymaqtastyq kúni» retinde atalyp ótedi. Halyqaralyq uıymnyń shtab-páteri Ystanbul qalasynda ornalasqan. Uıymǵa Qazaqstan, Ázerbaıjan, Qyrǵyzstan, Túrkııa, О́zbekstan elderi múshe. Al Majarstan baqylaýshy mártebesine ıe.
