Monopolııalardy retteýdegi mańyzdy mindetter

Memleket basshysynyń «Qazaqstan joly – 2050: bir maqsat, bir múdde, bir bolashaq» atty­ Joldaýyna qatysty baspasóz máslıhattary jalǵasyn taýyp jatyr. Keshe Orta­lyq kommýnıkasııalar qyzmetinde Tabıǵı monopolııalardy retteý agenttigi brıfıng ót­kizdi. Onda ótken jyl qorytyndylanyp, bıyl atqarylatyn mindetter týraly aıtyldy. Baspasóz máslıhatyna agenttik tóraǵasynyń orynbasarlary Asylbek Dúısebaev pen Amanjol Alpysbaev kelip, mekemeniń ótken jyly atqar­ǵan jumystary jóninde áńgimelep, Elbasy Jol­daýyndaǵy salaǵa qatysty júktelgen min­det­terge toqtaldy. Jýrnalıster aldynda sóz alǵan A.Dúısebaev «Memleket basshysy bizdiń vedostvoǵa qatysty birqatar tapsyrmalar berdi. Solardyń ishindegi eń bastylary – shaǵyn jáne orta bıznestiń damýyna jaǵdaı jasap, ın­fraqurylym tutynýshylarynyń quqyǵyn qalt­qysyz qorǵaý», dedi. Ol úshin tarıfterdi tek­ zań aıasynda ǵana bekitý kerektigin de qaperge saldy. Qazaqstan álemniń damyǵan 30 eliniń qataryna erkin enýdi kózdep otyr. Bul maqsat Memleket basshysynyń «Qazaqstan-2050» Strategııasynda anyq kórsetilgen. Osynaý bıik maqsatqa jetýdegi el damýynyń jańa mindetteri ekonomıkanyń tıimdi ınfraqurylymdaryn qurý úshin aıryqsha jaǵdaı jasaýdy talap etedi. Naqty aıtqanda, salaǵa tolyq jańǵyrtý júrgizbeı, ekonomıkanyń tıimdi ınfraqurylymyn jasaý múmkin emestigine kózimiz jetti. Sondyqtan aldyńǵy qatarly memleketterdiń tájirıbesine súıenip, monopolııalardy retteýdi kezeńdep engizip jatyrmyz. Basty maqsat ınvestısııalyq tartymdylyqty arttyryp, keń aýqymdy jańǵyrtý júrgizý bolyp otyr, dedi A.Dúısebaev. Tóraǵa orynbasarynyń sózine sensek, búginde sýyq jáne ystyq sý eseptegish quraldaryn ornatyp, jaraqtandyrý deńgeıi elimizde shamamen 85, al ystyq sý boıynsha 88,3 paıyzdy quraıdy eken. Al kóp páterli úılerge ortaq jylý esepteıtin qurylǵylardy ornatý áli kúnge ózekti másele kórinedi. Bıylǵy jyly olardy ornatýdyń balamaly tetigi engizilipti. Ol boıynsha esepteý qurylǵylary monopolıs­ter esebinen ornatylatyn bolady. «Memleket basshysynyń tapsyrmasyn oryndaý maqsatynda balamaly tetikti engizemiz. Degenmen, jylý esepteý qurylǵylaryn ornatý jónindegi is-sharalardy bıýdjet esebinen de iske asyramyz. Sóıtip, buıyrtsa 2014 jyldyń sońyna deıin qurylǵylarmen eldi 100 paıyz jaraqtandyrý josparlanyp otyr», dedi baıandamashy. Qazirgi ýaqytta agenttik Ekonomıka jáne bıýdjettik josparlaý mınıstrligimen birlesip, tarıftik saıasat jóninde 2030 jylǵa deıingi uzaqmerzimdi baǵdarlama ázirlep jatqan kórinedi. Baǵdarlamada tutynýshylardyń múddesi únemi eskerilip, shaǵyn jáne orta bıznestiń qanatyn erkin jaıyp damýyna jol ashady eken. Sondaı-aq, tarıf belgileýde ashyqtyqty jáne onyń móldirligin qamtamasyz etetin, kórsetiletin qyzmetterdiń sapasyn kóterip, qarajattyń maqsatty paıdalanylýyna baqylaýdy kúsheıtetin zań jobasy da daıyndalypty. Bul zań jobasy boıynsha salada jarııaly tyńdaýlardy jáne monopolısterdiń jyl saıynǵy esep berýin ótkizý tásilderine ózgerister engiziledi. Osyǵan oraı, mysaly, monopolıster tarıfti kóterý boıynsha ótinishterdi elektrondy úlgide berýine múmkindik jasalady. Keleshekte bul shara mindetti bolyp tabylady. Oǵan qosa, tarıftik smeta men ınvestısııalyq jobany oryndaý týraly esepterdi qaraýǵa qoǵamdyq monıtorıng júıesin engizý sharasy usynylypty. Atalǵan zań qazir memlekettik organdardyń kelisimderinen ótip jatqan kórinedi. Jýrnalısterdiń kóptegen suraqtaryna jaýap bergen agenttik tóraǵasynyń orynbasarlary, elordaǵa qatysty «Astana boıynsha tarıfterdiń qymbattaýy bolmaıdy. Sebebi, bas qaladaǵy úsh tabıǵı monopolııa sýbektisinen ázirge ótinishter túsken joq», dedi. Nurbaı ELMURATOV, «Egemen Qazaqstan».