Bul týraly AShM baspasóz qyzmeti habarlady.
Karantındik fıtosanıtarııalyq baqylaý júrgizý kezinde fıtosanıtarııalyq talaptarǵa jaýap bermeıtin karantınge jatqyzylǵan kelesi ónimderdiń ákelinýine tosqaýyl qoıyldy:
- Reseı Federasııasynan 743 tonna bıdaı, arpa, kartop, noqat, qyzanaq, qııar, burysh, qyzylsha, baıaldy, alma, banan, keptirilgen jemister, 265 m3 aǵash materıaldary jáne 10 479 dana shópti ósimdik kósheti jáne gúl daqyldarynyń tamyrlary;
- Qyrǵyzstan Respýblıkasynan 57,2 tonna alma, almurt, shyrǵanaq;
- Aýǵanstannan 10 tonna keptirilgen órik;
- Túrkııadan 20 tonna keptirilgen órik;
- О́zbekstannan 0,35 tonna júzim, qurma, qaýyn tuqymy, jońyshqa tuqymy jáne 10 dana shyrsha kósheti.
«Nátıjesinde ósimdikter karantıni salasyndaǵy zańnamany buzýǵa jol bergen tulǵalar QR ÁQBtK-niń 400-baby boıynsha ákimshilik jaýapkershilikke tartylyp, 3,8 mln teńge somasyna ákimshilik aıyppul salyndy. Negizgi buzýshylyqtar fıtosanıtarııalyq sertıfıkattyń bolmaýy, tańbalaýdyń bolmaýy jáne karantınge jatqyzylǵan ónimdi qaıtalama tekserýge usynbaý bolyp tabylady», delingen vedomstvo habarlamasynda.
Sonymen qatar Qyrǵyzstan Respýblıkasynan 17 tonna almurt pen alma ónimderin ákelý kezinde Qazaqstan Respýblıkasy úshin karantındik obekt - Shyǵys jemis jemiri (Grapholita molesta) anyqtaldy.
Aıta ketsek, 2021 jyldyń 1 qańtarynan bastap QR Aýyl sharýashylyǵy mınıstrligi Agroónerkásiptik keshendegi memlekettik ınspeksııa Komıtetiniń ósimdikter karantıni jónindegi memlekettik ınspektorlary ósimdikter karantıni salasynda 4,9 myń zań buzýshylyqty anyqtap, nátıjesinde 367,1 mln teńge somasyna ákimshilik aıyppul salyndy.
