Feısbýktyń burynǵy qyzmetkeri Frensıs Hogannyń aıtýynsha, kompanııanyń basty maqsaty – jeli qoldanýshylarynyń qaýipsizdigi emes, qarjylyq paıda tabý ǵana. Senat tyńdaýyna qatysqan ol feısbýkqa tıesili ınstagram áleýmettik jelisiniń jas qoldanýshylarǵa, ásirese boıjetkenderge kesiri týraly málimdep, reforma jasaýǵa shaqyrdy. Sonymen qatar onyń aıtýynsha, feısbýk platformasynda densaýlyq saqtaýǵa qatysty jalǵan aqparattyń taraýy – kompanııa ónimderin ótkizýdiń quıtyrqy joly. Ári osal toptarǵa manıpýlıasııa júrgizý de keńinen qoldanylyp kelgen-mys. Osy oraıda senatorlar Sýkerbergtiń ózi aldaǵy ýaqytta Kongress aldynda jaýap berýge tıis dep otyr.
«Meniń bul jerge kelip, kýálik etýimniń basty sebebi – feısbýk bizdiń qoǵam úshin qanshalyqty qaýipti ekendigin túsindirý. Eń aldymen bizdiń balalarymyz ben demokratııamyz úshin qaýipti. Bul kompanııanyń kúshi shekten shyǵyp barady. Qazirgi kezde feısbýk temeki sııaqty deńgeıge jetti. Jas balalar óz-ózin ustaı almaı otyr. Instagramnan bas almaıdy. Al ol jelige kirgen adam úlken manıpýlıasııaǵa ushyraıdy. Tipti feısbýktyń saldarynan ajyrasyp jatqan otbasylar bar. Sonymen qatar feısbýktyń júrgizip otyrǵan saıasaty – Efıopııa sııaqty elderde etnıkalyq zorlyq-zombylyqty týdyrýda», deıdi feısbýktyń burynǵy joba menedjeri Frensıs Hogan.
