Qasym-Jomart Toqaev Qazaqstan Dúnıejúzilik keden uıymynyń belsendi múshesi retinde yntymaqtastyqqa erekshe kóńil bóletinin aıtyp, Uıym basshysynyń elimizge kórsetken qoldaýy úshin rızashylyǵyn bildirdi.
Prezıdent pandemııa kezinde elimizde ulttyq ekonomıka men halyqaralyq saýdany qoldaý jóninde keshendi jumystar júrgizilip jatqanyna toqtalyp, bul jumystar qarqyn ala túsetinin jetkizdi.
Kýnıo Mıkýrııa Prezıdentke qabyldaǵany úshin alǵys bildirip, Qazaqstandy Ortalyq Azııadaǵy kóshbasshy el dep atap ótti.
DKU basshysy Túrkistan qalasyndaǵy kedendik ınfraqurylym nysandaryn aralaǵanyn aıtyp, jańa áýejaıdyń kedendik resimdeý prosesin joǵary baǵalady. Kýnıo Mıkýrııa oblys ortalyǵynyń «Shyǵys-Batys» baǵytyndaǵy tranzıttik áleýetiniń mańyzdy ekenine toqtaldy. Bas hatshy Qazaqstandaǵy keden salasynyń aıtarlyqtaı jetistikke jetkenin atap ótti. Sonymen qatar Bas hatshy Qazaqstannyń elektrondy kedendik deklarasııalaý rásimi men «bir tereze» qaǵıdatyn engizý tájirıbesi Uıymǵa múshe kóptegen elder úshin ozyq úlgi bola alatynyn aıtty.
Kezdesý sońynda keden salasyndaǵy yntymaqtastyqty jan-jaqty damytýǵa kelisti.
