Halyqaralyq baıqaýǵa qatysýǵa 11 elden ótinim túskenimen, alaıda pandemııaǵa baılanysty sheteldik qatysýshylardyń sany qysqaryp, tek tórt eldiń ókiline ruqsat berilgen.
«Álemdik pandemııaǵa qaramastan uıymdastyrýshylar baıqaýdy uıymdastyrǵanyna barlyq qatysýshy óte qýanyshty. О́ıtkeni kóptegen is-sharalar toqtatylyp, qatysýshylar, jankúıerleri, kórermender oflaın sharalardy, ádemi opera ónerin saǵyndy», dedi ádilqazy múshesi, Reseıdiń eńbek sińirgen ártisi, Sankt-Peterbýrg konservatorııasynyń professory T.D. Novıchenko.
Al Chehııadan kelgen meıman, ádilqazy múshesi, Praga operasynyń solısi, Komı Respýblıkasynyń halyq ártisi Damır Basyrov: «Mundaı baıqaýlar jańa urpaqqa mádenı-adamgershilik tárbıe berý úshin asa qajet. Biz jańa daryn ıelerin anyqtap, tanytý úshin keldik» dep, Bıbigúl Tólegenovaǵa baıqaýdy uıymdastyrǵany úshin alǵys aıtty.
Halyqaralyq baıqaýdyń ashylý saltanatyna qatysqan QR Mádenıet jáne sport mınıstri A.R. Raıymqulova baıqaýǵa qatysýshylardy jáne uıymdastyrýshylardy quttyqtap, Memleket basshysy Qasym-Jomart Toqaevtyń hatyn oqyp berdi.
Prezıdent quttyqtaý hatynda qatysýshylar men uıymdastyrýshylardy Qazaqstan Respýblıkasy Táýelsizdiginiń 30 jyldyǵynda ótkizilip otyrǵan baıqaýdyń ashylý saltanatymen quttyqtap, qazaqtyń bulbuly Bıbigúl Tólegenovaǵa osynshama jaýapty mıssııasy úshin alǵys aıtty.
«Esimi álemge áıgili Bıbigúl Tólegenova klassıkalyq vokaldyń damýyna zor úles qosyp, elimizdiń atyn álemge pash etti. Bıbigúl Ahmetqyzynyń arqasynda baıqaý júıeli túrde ótip, kóptegen daryn ıelerin tanytty. Baıqaý laýreattarynyń esimi álemge tanylyp, olar álem sahnalarynda án aıtyp júr. Halyqaralyq baıqaý arqyly kóptegen talantty jas tanymal bolyp, adamzattyń halyqaralyq mádenı qory baıydy», dep atap ótti Prezıdent.
Al Nur-Sultan qalasy ákiminiń orynbasary A.R. Oralov baıqaýǵa qatysýshylarǵa sáttilik tilep, qala ákimi Altaı Kólginovtiń quttyqtaý hatyn jetkizdi.
Aıta keteıik, baıqaýǵa 19-32 jas aralyǵyndaǵy vokalıster qatysady. Tyńdaýlar ashyq túrde ótedi. Án aıtý tártibi jerebe tastaý arqyly anyqtalyp, baıqaý sońyna deıin saqtalady. Sońǵy týrǵa jiberiletin qatysýshylar sany 14-ten aspaıdy. 5-8 qazan aralyǵynda irikteý týry, 10 qazan kúni sońǵy týr ótedi. Baıqaý jeńimpazdaryn marapattaý gala-konserti qazannyń 11-i kúni «Astana Opera» memlekettik opera jáne balet teatrynda ótedi.
HI halyqaralyq vokalıster baıqaýynyń qazylar alqasynyń tóraǵasy - KSRO men Qazaqstannyń halyq ártisi, Sosıalıstik Eńbek Eri, KSRO men Qazaqstannyń Memlekettik syılyqtarynyń laýreaty, akademık Bıbigúl Tólegenova.
Qazylar alqasynyń quramyna opera óneriniń sheberleri kirdi:
1. Ýrmancheev Tımýr Akrıamuly - Qazaqstan Respýblıkasynyń eńbek sińirgen qaıratkeri, Ulttyq óner ýnıversıtetiniń professory, «Qazaqkonsert» memlekettik konserttik uıymynyń kórkemdik jetekshisi, «Astana Opera» halyqaralyq opera akademııasynyń kórkemdik jetekshisi, «Qurmet» ordeniniń ıegeri. Qazaqstan, Nur-Sultan
2. Novıchenko Tamara Dmıtrıevna - Reseıdiń eńbek sińirgen ártisi, Sankt-Peterbýrg konservatorııasynyń professory, Reseı.
3. Gýsev Aleksandr - Foro Bonapart atyndaǵy mýzyka akademııasynyń professory, G.Donısettı atyndaǵy akademııanyń kameralyq án aıtý seksııasynyń meńgerýshisi. Italııa, Mılan.
4. Ýsmanov Ramız - Á.Naýaı atyndaǵy Memlekettik akademııalyq Úlken teatrdyń solısi, О́zbekstan Respýblıkasynyń halyq ártisi, halyqaralyq baıqaýlardyń laýreaty. О́zbekstan, Tashkent.
5. Basyrov Damır - Praga operasynyń solısi, Komı Respýblıkasynyń halyq ártisi, Chehııa.
6. Mılkıavıchıýte Irena - Lıtva KSR halyq ártisi, mádenıet jáne óner salasyndaǵy Lıtva ulttyq syılyǵynyń laýreaty, Lıtva mýzyka jáne teatr akademııasynyń professory. Lıtva, Vılnıýs.
Baıqaýdyń bas seriktesi - «Samuryq Qazyna» AQ, áleýmettik seriktes - «Samruk- Kazyna Trust» korporatıvtik qory.
Baıqaýdy uıymdastyrýshylar: QR Mádenıet jáne sport mınıstrligi, Nur-Sultan qalasy ákimdigi, «Mıras» qoǵamdyq ulttyq mádenı qory» qoǵamdyq qory.
