Sarapshynyń aıtýynsha teńge baǵamy aldaǵy ýaqytta álsireýi múmkin, alaıda valıýta naryǵynda kúrt quldyraý qaýpi ázirge joǵary emes.
«Teńge baǵamyna áser etip otyrǵan negizgi faktorlardyń biri – Ulttyq banktiń valıýta satyp alýy. Sáýir aıynda Ulttyq bank Biryńǵaı jınaqtaýshy zeınetaqy qory (BJZQ) úshin shamamen jarty mıllıard dollar satyp aldy. Bul áreket teńgeni janama túrde qoldaý sharalarynyń toqtaýyna alyp keldi. Mamyr aıynda da valıýta satyp alý jalǵasty. Resmı málimetterge sáıkes, Ulttyq bank osy kezeńde BJZQ úshin shamamen 900 mıllıon dollarǵa jýyq qarjyǵa valıýta satyp alǵan», dedi sarapshy óziniń Instagram paraqshasynda.
Elemesovtiń pikirinshe, maýsym aıynda teńgege qysym saqtalýy múmkin. Buǵan Ulttyq qordan bólinetin transfertterdiń azaıýy jáne bazalyq mólsherlemeniń tómendeýi yqpal etýi yqtımal.
Soǵan qaramastan, sarapshy teńge baǵamynyń baqylaýsyz quldyraýy kútilmeıtinin atap ótti. Onyń aıtýynsha, qazirgi jaǵdaıdy daǵdarys deńgeıinde baǵalaýǵa negiz joq.
Aıta keteıik, mamyr aıynda teńge baǵamy 5,1 paıyzǵa álsirep, bir dollar úshin 486,51 teńgeni qurady. Al 2 maýsymdaǵy saýda qorytyndysy boıynsha dollar baǵamy 492,75 teńge deńgeıinde qalyptasty.
