«Qazaqstan» ortalyq konsert zalynyń sahnasynda ótetin aýqymdy jobada bıyl qashyqtan ótken irikteý kezeńniń 17 jeńimpazy óner kórsetedi. Irikteýge ár óńirden 8 ben 12 jas aralyǵyndaǵy 5 583 bala qatysqan bolatyn. Búgingi kesh «Sheteldik jáne otandyq hıt ánderge» arnalyp, jas ánshiler tanymal týyndylardy Ilıa Bashkatovtyń jetekshiligimen oryndaıdy. Balalardyń ónerin Álı Oqapov, Áıgerim Raqysheva (Ayree), Erden Jaqsybaev, Beıbit Kóshqalıev jáne Dıana Snegına syndy otandyq tanymal ánshiler baǵalamaq. Jankúıerler óz daýysyn www.baladauysy.kz saıtyna kirip, tańdaǵan oryndaýshyǵa bere alady.
Sondaı-aq VI maýsym aıasynda jáne Táýelsizdiktiń 30 jyldyǵyna oraı «Bala daýysy – án bulaǵy» atty balalar ánderi jınaǵynyń tusaýkeseri ótti.
2016 jyldan bastap «Bala daýysy» baıqaýy Qazaqstannyń mádenı ómirindegi eń iri oqıǵalardyń biri bolyp tabylady. Joba mýzykalyq daryndy balalardy anyqtap, oǵan qoldaý kórsetýdi, jańa balalar ánderi arqyly balalar mýzykalyq shyǵarmashylyǵyn jan-jaqty nasıhattaý jáne damytýdy maqsat etedi. Sondyqtan jınaq balalar repertýaryn keńeıtýge, baıytýǵa óz úlesin qosady.
Bul jańa ánder jınaǵyna elimizdiń óńirlerinen 17 kompozıtor men 4 aqynnyń shyǵarmalary engen. Jınaqta mátinder men mýzykalyq materıaldar bar, al dıskide ánderdiń eki túrli nusqasy berilgen (daýysy bar jáne daýysy joq fonograma). Aıta keteıik, 2016 jyldan bastap Ulttyq «Bala daýysy» jobasy aıasynda 79 jańa balalar áni jazylǵan. Uıymdastyrýshylardyń aıtýynsha, jınaq balabaqshalar men mekepterge tegin taratylady.
– Bul jınaq talantty balalar úshin jaqsy múmkindik bolmaq. Jańa ánderdi oryndaı otyryp, olardyń Otanǵa degen mahabbaty men bolashaǵyna degen senimi arta túsedi, – deıdi «Jandaný álemi» qorynyń basqarma tóraǵasy Murat Isahanov.
Jınaqqa engen án avtorlary – kompozıtorlar Balnur Qydyrbek, Bekjigit Serdáli, Erkin Nurymbetov, Kómek Ybraıuly, Berik Orazalın, Arsen Beısenov, Marat Sýtıýshev, Svetlana Stepýrına, Jandos Omarov, Marat Jaqypov, Bolat Qohamanov, Maıra Ablaı, Álı Ermekbaev, Erjan Qorǵanbek, Ádılhan Adyrbaev, Sáýken Álish, Aısulý Tánı arnaıy Alǵys hattarmen marapattaldy.
– Avtorǵa óz shyǵarmasynyń keń taralǵanynan artyq baqyt bar ma! Sondaı-aq osy jobaǵa atsalysqan barlyq kompozıtordyń atynan «Jandaný álemi» qorynyń uıymdastyrýshylaryna alǵys aıtamyn. Biz óz ánderimizdiń júrekten júrekke jetetinine senimdimiz. Jınaqtaǵy ár án – bizdiń elimizdegi ár otbasyna joldaǵan ystyq sálemimiz, aq nıetimiz, – deıdi kompozıtor Aısulý Tánı.
Aqyndar Arasanbaı Estenov, Ernur Seıdahmetov, Marat Ádibaev, Almat Isádil de marapattalyp, jınaqqa ıe boldy.
Osy maýsymnyń jeńimpazdaryn 9 qazanda biletin bolamyz. El Táýelsizdiginiń 30 jyldyǵyna jáne «Bala daýysy» jobasynyń 5 jyldyǵyna arnalǵan «Týǵan kúnińmen, «Bala daýysy!» atty gala-konsertte ónerpazdar aldyńǵy jyldardyń fınalısterimen birge tanymal ánderdi oryndaıdy. Aıta keteıik, fınalǵa qatysatyn árbir jas ánshige baǵaly syılyqtarmen qatar arnaıy músinshe (statýetka) tabystalady. Al «Bala daýysy» baıqaýynyń gran-prı ıegerine Ulttyq óner ýnıversıtetinde oqý granty beriledi.
