Mańǵystaý aýdanynyń ortalyǵy Shetpe aýylynda un shyǵaratyn seh ashyldy. Kombınat táýligine 3 tonna un óndiredi. Mańǵystaý oblystyq kommýnıkasııa qyzmeti usynǵan málimette qazir sehtyń aýyl turǵyndarynyń qajettiligin ótep otyrǵany aıtylady. Ázirge tutynýshylardyń ákelgen bıdaıyn tartyp berý jumystaryn uıymdastyratyn kásipker aldaǵy ýaqytta astyqty óńirlerden bıdaı ákelip, un shyǵarýdy josparlap otyr.
Bul kásipti bastaý úshin «Segizbaı Ata» óndiristik kooperatıviniń basshysy Muhtar Qarmysov zamanaýı úlgidegi qurylǵyny satyp alý úshin «Kaspıı» áleýmettik-kásipkerlik korporasııasy arqyly 10 mln teńge qaıtarymdy qarjy alǵan. Satyp alǵan apparaty bıdaıdy tazalap, shańyn qaǵyp, tartyp shyǵarady, al qýatyna kelsek kúnine 5 tonnaǵa deıin un óndirýge qaýqarly.
– Qazir kombınat 2 adamdy turaqty jumyspen qamtyp otyr. Bolashaqta sehtyń qýattylyǵyn arttyryp, qyzmetker sanyn kóbeıtýdi kózdep otyrmyn, – deıdi M.Qarmysov.
Jergilikti turǵyndar jeke kásipkerdiń qyzmetine sáttilik tilep, kásibiniń arnasy keńeıip, halyqqa kórseter qyzmetiniń baıandy bolýyna tilek bildirýde.
Mańǵystaý oblysy
