Qalpyna keltirý jumystary qarqyndy

Oqıǵa oryn alǵan kúnnen bastap Memleket basshysy Qasym-Jomart Toqaev jarylys zardaptaryn joıý týraly naqty tapsyrma bergen bolatyn. Prezıdent tapsyrmasyna oraı, búginde Baızaq aýdanynda búlingen nysandardy qalpyna keltirý jumystary júrgizilýde. Oǵan 12 merdigerlik uıymnan 22 birlik tehnıka men 187 jumysshy tar­tylǵan. Al qazirgi kezde jeńil zardap shekken 124 tur­ǵyn úı men 3 áleýmettik nysan tolyǵymen qalpyna keltirilgen. Jambyl oblysynyń ákimi Berdibek Saparbaevtyń aıtýynsha, zardap shekken nysandardy qalpyna keltirý boıynsha bar­lyq jumystar Memleket bas­shysynyń baqylaýynda eken. Sondaı-aq Prezıdent pár­meni­men qurylǵan Úkimettik ko­mıs­sııanyń tapsyrmasy boıyn­sha nysandardy tekserý jáne qal­pyna keltirý úshin jergilikti atqarýshy organdardan bes jumys toby qurylǵan. Jumys nátıjesinde seısmıkalyq qaýipti jaǵdaıdaǵy Jibek joly aýylyndaǵy №5 orta mek­tep­ke 150 oryndyq jańa ǵıma­rat salý úshin jobalyq-smeta­lyq qu­jattama ázirlengen. Qury­ly­sy qyzý júrip jatqan jańa bilim osha­ǵy keler jyldyń qańtar aıynda paıdalanýǵa beriledi dep josparlanǵan. Jalpy, demeý­shilik esebinen 150 mıllıon teńgege 127 nysan qalpyna kel­tirilse, aıtarlyqtaı zardap shek­ken nysandardy qalpyna keltirý úshin Úkimettik qordan 1,2 mıllıard teńge bólingen. Al qalpyna keltirý jumystary bıyl 30 qazanǵa deıin aıaqtalady. Bul rette Berdibek Saparbaev zardap shekken 87 áskerı qyz­metshige, tótenshe jaǵdaılar departamenti men prokýratýra qyzmetkerlerine oblys ákiminiń rezervinen jalpy 25,4 mıllıon teńge kóleminde kómek beri­letindigin aıtty. Jalpy alǵanda, óńirde tótenshe jaǵdaı zardaptaryn joıý, oqıǵadan zardap shekkenderge qoldaý kórsetý jumystary jalǵasýda.

О́kinishke qaraı, Baızaq aýdanynda oryn alǵan jarylys saldarynan 17 adam qaza tapty. Bir adam áli izdestirilýde. Búginde qaıtys bolǵan áskerıler men qutqarýshylardyń otbasy­laryna da tıisti barlyq áleý­mettik kómekter kórsetilýde. Mem­leket basshysy Qasym-Jo­mart Toqaevtyń tapsyrmasyna oraı, óńirde marqumdardyń jáne olardyń otbasylarynyń bank­tegi, túrli qarjy uıymdaryndaǵy bereshekterin óteý boıynsha jumystar júrgizilýde. Qazirgi tańda Úkimet, elimizdiń Qarjy nary­ǵyn retteý jáne damytý agenttigi men Jambyl ob­ly­s­y­nyń ákimdigi banktermen, son­daı-aq, ózge de qarjy uıym­­­darymen birlesip, jary­lystan qaza tapqandardyń otbasylarynyń boryshtyq júk­temesin azaıtý jóninde sharalar qabyldady. Banktermen, mık­ro­qarjy uıymdarymen jáne kol­lek­torlyq agenttiktermen jú­rgizilgen jumys nátıjesinde qaı­tys bolǵan qaryz alýshylar men olardyń jesirleriniń bere­shekterin tolyq kólemde esep­ten shyǵarý jóninde bir­yń­ǵaı sheshim qabyldanǵan. Bú­gingi tańda 47 qaryz boıyn­sha barlyq bereshekter ótelgen. Budan bólek, qarjylaı kómek­ter de kórsetilgen. Máse­len, Memlekettik áleýmettik saqtan­dyrý qory jáne respýblıkalyq bıýdjet qarajaty esebinen asyraýshysynan aıyrylǵan 14 otbasyna 76 myń teńgeden 260 myń teńgege deıingi aı saıynǵy jár­demaqy taǵaıyndalǵan. Atalǵan járdemaqy bıyl qazan aıynan bastap belgilengen. Bir aıta keterligi, bul járdemaqynyń mólsheri otbasy asyraýyndaǵy adamdar sanyna qaraı tólenedi. Al árbir qaza tapqan azamattyń otbasyna úkimettik qordan 10 mıllıon teńgeden qarjylaı kómek kórsetýge jalpy 170 mıllıon teńge kóleminde qarajat bólinse, oblystyq bıýdjet ese­binen árbir otbasyna 5 mıllıon teńge kóleminde materıaldyq kómek kórsetýge 85 mıllıon teńge qaralǵan.

Baızaq aýdanynda oryn alǵan jarylystan Qaınar, Úshbulaq, Jibek joly aýyldaryndaǵy nysandar zardap shekken. Búginde Qaınar aýylyndaǵy 19 úıdi, Jibek joly aýylyndaǵy 12 úıdi jáne Úshbulaq aýylyndaǵy 4 úıdi jóndeýge 250 mıllıon teńgege jýyq qarjy bólingen. Al Jibek joly aýylyna jańa mektep salýǵa 729 mıllıon teń­ge bólinse, búlingen joldy qal­pyna keltirýge 35 mıllıon teńge kóleminde qarajat qara­lady dep josparlanǵan. Jary­lys aımaǵyna eń jaqyn núktede ornalasqan Qaınar aýylynda qazirgi kezde 19 úı jóndelýde. Alaıda eki-úsh úıdi qalpyna keltirý jumystary ótken aptanyń sońynda ǵana bas­taý alǵan. Búginde shatyrlarda turyp jatqan turǵyndardyń da úıleri qazan aıynyń sońyna deıin bitetin bolady.

Qazirgi kezde Baızaq oqıǵa­syna baılanysty kóptiń kóke­ıinde kúrdeli suraqtardyń týa­tyny anyq. Máselen, bólingen qarajat barlyq úı­lerdi qalpyna keltirýge tolyq jete me degen saýal. Úkimet tarapynan 1 mıl­lıard 200 mıllıon teńge qaral­ǵan. Berdibek Saparbaevtyń aıtýynsha, árbir úıdiń smetasy bekitilgen, árbir úıge qansha shyǵyn kelgeni anyqtalǵan. Úıler­diń de shyǵyny osy bólin­gen qarajattyń ishine kiredi eken. Ákim de eshqandaı qurylys kompanııasy qarjysyz qalmaıtynyn aıtyp otyr. Sol sııaqty oqıǵaǵa kinálilerdiń anyqtalýy da kóptiń kókeıindegi máseleniń biri. Búginde Memleket basshysynyń tapsyrmasymen Bas prokýratýra men Ishki ister mınıstrligi mamandarynan jasaqtalǵan tergeý toby qazirgi tańda jumys atqarýda. «Qalaı jumys bitedi, solaı resmı túrde habarlanatyn bolady. Oqıǵanyń sebebin, kináli­ni sol kezde bilemiz. Son­dyq­tan jerlesterimnen eshqandaı jalǵan aqparatqa, laqap sózder­ge senbeýlerin suraımyn. Al naqty málimetti arnaıy quryl­ǵan shtab­tan alý kerek», deıdi Ber­di­bek Saparbaev. Sondaı-aq aı­maq­taǵy jarylys kezinde habar-osharsyz ketken bir azamat ta qazirgi kezde izdestirilýde. Áli de izdeý sharalary jalǵasa beredi.

Jambyl oblysy