Jergilikti ákimdiktiń mereıli mereke qarsańynda qýana kórseter jańalyqtarynyń biri – Jańaózen qalasynan memlekettik baǵdarlama boıynsha salynyp jatqan turǵyn úı qurylysy. Jalpy, munaıly qalada memlekettik baǵdarlama boıynsha salynyp jatqan úıler bar, sonyń biri – «Nurly jer» baǵdarlamasy aıasynda boı kótergen 160 páterli turǵyn úı. «Raýan» shaǵyn aýdanynda salynyp jatqan úı qurylysy úshin Jańaózen qalasynda alǵash ret Ulttyq qordan qarjy bólingen. Bıyl bólingen 1 mlrd teńgeniń jumystaryn 75 adam júrgizýde.
– 160 páterli turǵyn úı qurylysy bıyl qyrkúıek aıynda, ıaǵnı keshe ǵana bastaldy. Eki bloktan turatyn úıde bir páterli 40, eki páterli 80, úsh páterli 80 úı bar. Bir bólmeli páterler kólemi – 54 sharshy metr, eki bólmeli úıler 67 sharshy metr bolsa, úsh bólmeli úılerdiń kólemi – 80 sharshy metr. «As-qurylys» kompanııasynyń bas merdigerligimen qurylysy bastalǵan úıdi tolyq aıaqtap, óz ıelerine 2022 jyly tamyz aıynda paıdalanýǵa berýdi mejelep otyrmyz, – deıdi Jańaózen qalalyq qurylys bóliminiń sektor meńgerýshisi M.Ábdirov.
Úılerdiń qonaǵy da, bala-shaǵasy da kóp bolatyn qazaqy turmysymyzǵa laıyqty etip keń salynýdy josparlaǵany qýantty. Jınaq bankiniń salymshylaryna beriletin úı munaıly qalada baspana máselesin sheshe almaı júrgen kóp qandastyń qýanyshyna sep bolaryn oılap qýandyq.
Baspasóz-týryn uıymdastyrýshylardyń ekinshi tańdap kórsetken nysany qaladan on shaqty shaqyrym qashyqtyqtaǵy 7 myńnan asa turǵyny bar Qyzylsaı aýylyndaǵy jańa dárigerlik ambýlatorııa boldy. Buǵan deıin eski jáne shaǵyn apatty jaǵdaıdaǵy ambýlatorııada basy aýyryp, baltyry syzdaǵan aýyl turǵyndaryna dárigerlik qyzmet kórsetip kelgen dárigerler jańa oryndy kútip, aýyldaǵy mádenıet úıiniń bólmelerin saǵalaǵan bolatyn. Bul mádenıet qyzmetkerlerine de, dárigerlerge de, ásirese aýyl turǵyndaryna qolaısyzdyq týyndatyp, bári de jańa ambýlatorııa qurylysynyń tezirek aıaqtalýyn asyǵa kútken bolatyn. Kópshilik kútken jańalyq halyqqa keń, zamanaýı dárigerlik qural-jabdyqtarmen jáne jańa jıhazdarmen jabdyqtalǵan, eń bastysy dáriger mamandary jetkilikti ambýlatorııa bolyp esik ashty.
– Búgingi kún Jańaózen qalasy tarıhynda, Qyzylsaı aýyly tarıhynda este qalarlyq kún boldy desem, artyq aıtqandyq bolmas. Elimizde kóptegen aýrýhanalar, ambýlatorııalar ashylyp jatyr. Buryn júrekke otany búkil álem boıynsha medısınasy ozyq damyǵan elderde ǵana jasaıtyn bolsa, qazir bizdiń elimizde sátti júzege asyrylyp keledi. Tamyr arqyly ota jasaý tipti ortalyqtan alys ornalasqan oblys ortalyqtarynda da qoljetimdi bolǵandyǵy úshin qýanamyz. Munyń bári bizdiń elimizdiń 30 jyl ishinde jetken jetistigi jáne bul jetistikter osymen toqtap qalmaıdy. Qazaqstan qaı salada da jańarǵan, jańǵyrǵan zaman talabyna saı jetistiktermen birge damı beredi, – dedi Jańaózen qalasynyń ákimi M.Ibaǵarov.
Onyń aıtýynsha, «Jumyspen qamtýdyń jol kartasy – 2020» memlekettik baǵdarlamasy aıasynda qurylys bir jylda salynǵan, 5 myńnan asa adam tirkelgen Qyzylsaı ambýlatorııasy úshin 400 mln-nan astam teńge qarajat bólindi, qazir jańa dárigerlik ǵımaratta 40-tan asa kabınet bar, mamandarmen tolyq qamtylǵan, munda emdelýshiler ýltradybystyq, rentgen zertteýleri men tis emdeý jáne zerthana qyzmetterin paıdalana alady.
– Dárigerlik ambýlatorııa Jańaózen qalasyn áleýmettik-ekonomıkalyq damytýdyń 2019-2025 jyldarǵa arnalǵan keshendi jospary jáne Nur Otan partııasynyń 2025 jylǵa deıingi «О́zgerister joly: Ár azamatqa laıyqty ómir!» saılaýaldy baǵdarlamasy aıasynda aýyl turǵyndarynyń ómir súrý sapasyn arttyrý maqsatynda iske qosyldy. Endi Qyzylsaı aýylynyń turǵyndary qalaǵa barmaı-aq, qajetti medısınalyq kómekti aýyldan ala alady. Dárigerlik nysan halyqqa sapaly, shuǵyl qyzmet kórsetedi dep senemin, dárigerlik ambýlatorııa qutty bolsyn! – dedi M.Ibaǵarov ǵımarattyń ashylý saltanatynda.
Kúnine 50 adamdy qabyldaýǵa arnalǵan ambýlatorııaǵa endi qyzylsaılyq 5 myńnan asa turǵyn qajetti kezde óz densaýlyǵy úshin bas suqpaq. Myńǵa tarta bala týý jasyndaǵy áıelder men 2 myńnan asa bala tirkelgen aýylda jańa ǵımaratta kórsetiletin dárigerlik qyzmettiń sapasy qandaı bolmaq?
– Bir jylǵa jetpeı qurylys jumystary aıaqtalyp, qoldanysqa berilgen ambýlatorııada tájirıbeli, óz isiniń sheber dárigerleri qyzmet etedi. Munda pedıatr, ÝZI dárigeri, tis dárigeri bar, sondaı-aq 26 medbıke, 3 kishi qyzmetker jumysta. Jýyrda 2 jas mamandy qyzmetke qabyldadyq. Ambýlatorııada qosymsha ekpe, ftızıatr kabınetteri jasaqtaldy jáne stomatologııaǵa sońǵy úlgidegi apparat alyp qondyryldy, júkti áıelderge arnalǵan kabınet, kúndizgi emdeý, em-shara kabıneti men skrınıng bólmesi, psıholog bólmesi, oqshaýlaý bólmesi men zerthana bar. Jas mamandarǵa áleýmettik qoldaý kórsetiledi, – deıdi №1 Jańaózen qalalyq emhanasy dırektorynyń emdik-profılaktıkalyq isi jónindegi orynbasary Q.Baljanova.
Qyzylsaı aýylynda tórtinshi dárejeli jedel járdem qyzmeti de bar, ıaǵnı aýyl turǵyndarynyń suranysy boıynsha Jańaózen qalalyq «jedel járdem» qyzmetiniń ókilderi táýlik boıy atalǵan aýylda bolyp, óz kabınetterinde shaqyrtý qabyldaıdy eken.
Aýyl turǵyndary atynan sóz alǵan ardagerler keńesiniń tóraǵasy A.Qamenov pen ardager ustaz B.О́skinbaev qýanyshtaryn jetkizip, aýyldastary atynan alǵys aıtty.
Qalada jańadan kásip bastaýshylar sany artyp keledi deıdi ákimdik qyzmetkerleri. Solardyń biri gúl saýdasymen aınalysatyn Baqtyqoja Orysbaev eken. 1994 jyly týǵan jas jigit múmkindigi shekteýli jandar sanatyna jatqanmen, óz kásibin ózgelerden kem júrgizbeýde.
– 2015 jyldan bastap gúl saýdasymen aınalysa bastadym. Oǵan 2014 jyly múgedekterge beriletin járdemaqy sebepshi boldy. 28 myń teńge aqshany alyp, aldymen kishigirim jumystardan bastadyq. Gúlderge orama jasap, gúl shoǵyryn daıyndap qaladaǵy túrli merekelerde, saltanatty sharalarda, jekelegen týǵan kúnderde, toı-tomalaqtarda syıǵa beriletin gúlderdi sattyq. Keıin gúl dúkenin ashyp, Almatyda arnaıy daıyndyqtan ótip keldik. Jumysymyzdyń kókjıegin keńeıtip, kásibimizdi ulǵaıttyq. 2019 jyly Eýropada tájirıbeden ótý, býketti zamanaýı daıyndaý, ıaǵnı orap, bezendirý boıynsha tájirıbe jınaý múmkindigi týyndady, – deıdi jas kásipker Baqtyqoja.
Aqtaý, Jańaózen qalalarynan saýda oryndaryn ashqan Baqtyqojanyń Mańǵystaýda 3, Qulsaryda 1 saýda orny bar, endi Atyraý qalasynan ashýdy josparlap otyr. 20 shaqty adamdy jumyspen qamtyp, olarǵa jalaqy tólep kelgen kásipker jumyspen qamtý ortalyǵymen aradaǵy qýanyshty jańalyqty da jetkizdi.
– Jumyspen qamtý ortalyǵy bizge kómektespek, bul – úlken qýanysh, úlken qoldaý. Olar aldymen bir jyl boıy qyzmetkerlerge 100%, keler jyly 70%, úshinshi jyly 30% jalaqy tólep beremiz, odan ári jumystaryńyzdy ózderińiz júrgizesizder dedi. Bul bizge memleket tarapynan zor kómek, sondyqtan rahmet aıtamyz. Mundaı jaǵdaıda biz áli de jumysqa adam qabyldaımyz, – dedi ol.
Jańaózenge gúlder Amsterdamnan, Kenııadan, Ekvadordan ushaqpen, júk kólikterimen tasymaldanady eken. Úlken kompanııalarmen seriktes, Ekvadorda brokerleri bar jańaózendik jas kásipker gúl saýdasynyń tolastamaıtynyn, ásirese gollandııalyq raýshan men ekzotıkalyq gúlderge suranys kóp ekenin aıtady.
Otbasynda bir qyz balany tárbıelep otyrǵan, qıyndyqta saǵy synbaǵan qaısar jigittiń kásibi kópke úlgi.
Jańaózen qalasyndaǵy psıholog, defektolog Aıgerim Nuradınovanyń qyzmeti de turǵyndardyń suranysyna ıe. Balalar arasynda jıi kezdesetin tildik tejelýleriniń aldyn alý maqsatynda ashqan logopedııalyq ortalyǵyna qazir 12 bala keledi. Aptasyna úsh ret bir saǵattan qatynaıtyn olar sóılep úırený, tilin jattyqtyrý baǵytynda psıhologııalyq kómek alady. Buǵan deıin balalardy kabınette qabyldaǵan Aıgerim óz qyzmetine júginýshilerdiń sanynyń artýyna oraı arnaıy ortalyq ashýdy jón dep tapqan. «Aldaǵy ýaqytta qasyma mamandar alyp, búgingiden de jaqsy nátıjelerge qol jetkizgim keledi. Mysaly, jekelegen jumystarmen birge toptyq jumystyń bereri kóp, sondyqtan toptyq jumystar júrgizýdi maqsat etip otyrmyn. Sondaı-aq logoped-defektolog mamandardy jumysqa alyp, esepte turǵan, múmkindigi shekteýli balalar úshin tegin ári jeke jumys istegim keledi, – deıdi psıholog-defektolog A.Nuradınova.
Jańaózende Táýelsizdiktiń 30 jyldyǵy aıasynda atqarylar jumystar jalǵasyn taýyp, halyq turmysynyń kórkeıýine, el damýyna úlesin qosa bersin, óıtkeni árbir aýyldyń, qalanyń damýy – el damýyna qosylar zor úles.
