«Qostanaı Plaza» saýda ortalyǵynyń aldynda ótken qorytyndy sharada oblystyq densaýlyq saqtaý basqarmasy basshysynyń mindetin atqarýshy Rústem Aıtbaev zeınetkerge temir tulpardyń kiltin tabys etti. О́ziniń aıtýynsha, Valentına Brým bala-shaǵasynyń qarsy bolýyna qaramastan, jasyryn baryp ekpe alypty.
– Qyzym vaksınany densaýlyǵym kótermeıtinin aıtyp, emhanaǵa barýǵa asyqpaýymdy aıtty. Degenmen óz erkimmen el qatarly ekpe alý kerek dep sheshtim. Qyzyma aıtpaı ekpe pýnktine baryp, vaksınanyń alǵashqysyn tamyz aıynda, ekinshisin qyrkúıektiń ortasynda qabyldadym. Keri áseri bolǵan joq, eshbir jaısyzdyq sezingen joqpyn. Onyń ústine, bul qadamym oılamaǵan jerden úlken oljaǵa keneltti. Shynymdy aıtsam, buǵan deıin mundaı qymbat syılyq alyp kórmeppin. Uıymdastyrýshylar telefon shalyp quttyqtaǵanda, áýelde senbegenim ras. Endi, mine, búgin sý jańa kóliktiń kilti qolyma tıip tur. О́zim osy jasqa deıin kólik róline otyryp kórmegenmin. Biraq nemerelerim bar, solardyń birine buıyraıyn dep tur. Ol jaǵyn úıge barǵan soń aqyldasa jatarmyz, – dedi Valentına Brým.
Valentına Fedorovnanyń nemereleri Reseı, Germanııa elderinde turady. Ájeleriniń kólik utyp alǵanyn estip olar da arnaıy kelip quttyqtaǵysy keletinderin aıtypty. Zeınetker endi nemereleriniń arasynda kishigirim «utys oıynyn» ótkizetinin aıtyp ázildedi.
Zeınetker kólik kiltin alǵan soń, sý jańa temir tulpardy kúıeý balasy tizgindep áketti. Oblystyq densaýlyq saqtaý basqarmasynyń aqparattyq-analıtıkalyq bóliminiń jetekshisi Ánýar Ediresovtiń aıtýynsha, aldaǵy ýaqytta taǵy da dál osyndaı utys oıynyn uıymdastyrý josparda bar.
