Zańnama jáne sot-quqyqtyq reforma komıtetiniń tóraǵasy Arman Qojahmetovtyń aıtýynsha, zańnama jáne sot-quqyqtyq reforma komıteti «Qazaqstan Respýblıkasynyń Qylmystyq kodeksine ólim jazasy máseleleri boıynsha ózgerister men tolyqtyrý engizý týraly» zańnyń jobasyn qarap shyqty.
«Zań jobasy Qazaqstan Respýblıkasy 2021 jylǵy 2 qańtarda ratıfıkasııalaǵan azamattyq jáne saıası quqyqtar týraly halyqaralyq paktige Ekinshi Fakýltatıvtik hattamanyń 1-babynyń 2-tarmaǵyna sáıkes ázirlendi. Zań jobasy ulttyq zańnamany qabyldanǵan halyqaralyq quqyqtyq mindettemelerge sáıkes úndestirýge baǵyttalǵan. Qazaqstan hattamany soǵys ýaqytynda jasalǵan áskerı sıpattaǵy asa aýyr qylmystar jasaǵany úshin kináli dep tanylǵannan keıin soǵys ýaqytynda ólim jazasyn qoldaný quqyǵyn ózine qaldyrady degen eskertpemen ratıfıkasııalady», dedi ol.
Sondaı-aq zań jobasyn talqylaý kezinde quqyqtyq aktiler týraly zań talaptaryna sáıkes zańnamanyń túsindirý apparatynda termınderdiń qazaq jáne orys tilderindegi jazylý tártibine qatysty redaksııalyq naqtylaýshy sıpattaǵy túzetý usynyldy.
«Parlament Májilisiniń turaqty komıtetteri zań jobasy boıynsha oń qorytyndylaryn berdi. Baıandalǵannyń negizinde komıtet osy zań jobasyn birinshi oqylymda Parlament Májilisi jalpy otyrysynyń talqylaýyna engizýge bolady dep esepteıdi», dep aıtty Arman Qojahmetov Májiliste.
Joǵaryda aıtylǵandardyń negizinde komıtet zań jobasyn birinshi oqylymda maquldaýdy usyndy.
Sonymen qatar depýtattar zań jobasyna qoldaý bildirdi.
